Biełaruska znajšła pracu dla svajho trochmiesiačnaha syna. Niemaŭlatka źniałosia ŭ rasijskim sieryjale
Maładaja maci raspaviała ŭ tyktoku, jaki ž hanarar atrymaŭ akcior, jaki pakul nie ŭmieje navat chadzić i razmaŭlać. Ciapier jana žartuje, što syn Śviatasłaŭ — jaje sponsar.
Śviatasłaŭ z maci
Viktoryja Viaršyckaja padpisanaja na telehram-kanały, dzie šukajuć masoŭku dla roznych televizijnych prajektaŭ. I ŭ adzin ź viečaroŭ jana pabačyła tam niezvyčajnuju abviestku: dla zdymkaŭ u rasijskim sieryjale šukali trochmiesiačnaje dzicia.
— Padumała: «Nu a čamu b nie? Ja ž ničoha nie hublaju», — raspaviała ŭ svaim tyktoku maładaja maci. — Dasłała fotazdymki syna, a na nastupny dzień mnie patelefanavali. Kinošniki byli ŭ zachapleńni, jany prapanavali dzieviać zdymačnych dzion.
Zarpłatu maleńkamu aktoru taksama paabiacali.
Viktoryja ŭdakładniaje: pa zakonie zdymačny dzień dla dziciaci nie moža być bolšym za čatyry hadziny. Ale zvyčajna kamanda imknułasia zrabić usio značna chutčej. Sami zdymki ciahnulisia 10‑20 chvilin, a kali płanavali zdymać niekalki scen za adzin dzień, dyk mamie ź niemaŭlatkam davali cichaje miesca. Tam Viktoryja mahła spakojna pakarmić syna dy pahulać ź im.
Z pryjemnych bonusaŭ — pa maci i akciora adpraŭlali kiroŭcu na «Teśle», jaki pryvoziŭ maleńkuju zorku na zdymačnuju placoŭku.
Śviatasłaŭ z aktrysaj, jakaja hraje hałoŭnuju rolu
Za adzin zdymačny dzień chłopčyku płacili 150 rubloŭ. U vyniku jaho pieršaja zarpłata skłała 1350 rubloŭ. Heta, darečy, bolš, čym jaho mama atrymlivaje dekretnych štomiesiac — zaraz jany składajuć kala 930 rubloŭ.
Pabačyć biełarusa možna budzie ŭ sieryjale «Uspaminaj mianie» režysiora Kaciaryny Dźvihubskaj. Premjera adbudziecca ŭžo paśla Novaha hoda.
Viktoryja kaža, što heta byŭ niejmavierny dośvied dla ŭsioj jaje siamji. Jany z mužam vielmi hanaracca synam, jaki ŭ try miesiacy trapiŭ na vialiki ekran.
Śviatasłaŭ z baćkami