«Cana kaśmičnaja»: sała ŭ Biełarusi stała raskošaj
U Biełarusi sała — nie prosta pradukt, a kulturny kod. Dla niekatorych — jašče leki ad drennaha nastroju i dobraja zakuska. Ale časy mianiajucca, i ciapier, kab kupić dobry kavałak takoha ščaścia, treba być nie prosta hałodnym, ale jašče i finansava padrychtavanym. Žurnalisty Tochka.by zazirnuli ŭ mahaziny i na rynki, pahladzieli na ceńniki.
Vybar vielizarny
Na Kamaroŭcy vielmi šmat prapanoŭ i jość cełyja rady hetaha praduktu.
Palicy realna łomiacca. Vyhladaje sała vielmi apietytna. Jość z kminam, časnakom, piercam, vendžanaje i prosta salonaje.
Samy tanny varyjant znajšli za Br26,9 za kh. Ale pa vyhladzie heta sała realna sastupała astatnim kankurentam. U cełym dyjapazon koštaŭ taki: Br29,9—39,9.
Razhavarylisia z adnym z pradaŭcoŭ, kab vyśvietlić, što-pačym.
«Svajo, fiermierskaje, nievierahodnaje, kuplajcie», — zapeŭniŭ mužčyna.
Sała realna, jak zajaŭlali, tajała ŭ rocie. Ale praz košt amal u Br40 za kh, hastranamičnyja zachapleńni prycichli.
Darečy, samy darahi varyjant — Br49,9 za kh. Heta vendžanaje na volsie sała.
Varyjant kala doma
Prašlisia karespandenty i pa roznych mahazinach, u tym liku sietkavych.
Naprykład, u «Karonie» ŭ kaŭbasnym adździele jość i sała. Niekatoryja kavałki vyhladali padsochłymi. Košty takija: Br17,64—29,9 za kh.
Taksama hety pradukt ad roznych vytvorcaŭ jość i ŭ vakuumnaj upakoŭcy. Samy tanny varyjant tut — Br16 za kh, maksimalny košt — Br29,5.
U «Susiedziach» u miasnym adździele była tolki hrudzinka. U vakuumnaj upakoŭcy — dva varyjanty sała pa Br25,99 i Br29,55. Toje, što tańniejšaje, vyhladała ničoha tak, toje, što daražej — padałosia nieapietytnym.
A voś u «Hipa» vybar bolšy. Košt praduktu na vahu nastupny: Br18,79—29,51. U cełym usie varyjanty hodnyja.
Jašče było sała va ŭpakoŭcy pa Br29,51 za kiłahram. Ale jano ŭsio, na pohlad karespandenta, niejkaje pamiataje, ci što.
A voś u «Jeŭraopcie» my znajšli na vahu tolki adzin vid hetaha praduktu. Košt — kala Br29 za kh.
U miasnym adździele była tolki hrudzinka. Adna ź ich, padobnaja na sała, kaštavała Br21,89 za kh.
Što dumajuć pakupniki
Aktyŭna canu miasnoj pradukcyi, u tym liku i sała, abmiarkoŭvajuć u internecie. Rolik adnaho z pradaŭcoŭ na Kamaroŭcy zalacieŭ u TikTok. Jon raskazaŭ, što sała pradaje pa Br29,9 za kh, hrudzinku — pa Br34, palandvicu — pa Br40, «kryvianačku» z hrečkaj — pa Br19.
Mnohija stali aktyŭna kamientavać videa. Adny zachaplalisia, inšyja — aburalisia cenami.
Voś niekatoryja mierkavańni:
«Tak, biełarusy — sapraŭdnyja ŭmielcy!»
«Usio apietytna, smačna, možna brać».
«Ja ŭ šoku ad cen».
«Ledź ślinoj nie padaviłasia».
«Cana kaśmičnaja, žudasna».
«Ludzi, ceny ździŭlajuć? A jak usio heta vyraścić i potym pryhatavać? Kolki sił i času dla hetaha treba».
«Pasprabujcie sami. Pradukcyja šykoŭnaja, haspadar taksama. Ale piensijanier tolki moža pahladzieć i padavicca ślinaj. Tak, ja razumieju, jakaja heta praca».
«Cana — kosmas».