Kasparaŭ: Ukraincy hinuć za nas! A heta ryełtarskaja ździełka, kab uzbahacić siamju Trampa i pradać Ukrainu!

Adzin ź lidaraŭ rasijskaj apazicyi, były čempijon śvietu pa šachmatach, vice-prezident World Liberty Congress Hary Kasparaŭ vystupiŭ u dyskusii na Suśvietnym forumie pa biaśpiecy ŭ kanadskim Halifaksie z vostraj i emacyjnaj pramovaj, u jakoj bieskampramisna raskrytykavaŭ nierašučaść zachodniaha śvietu i zaklikaŭ da maksimalnaj padtrymki Ukrainy.

Hary Kasparaŭ. Fota: AP Photo / Mindaugas Kulbis

«Heta najlepšaje šou, pra jakoje Pucin nie moh i maryć. Nivodnaha pramoha adkazu. Heta nie pra toje, kolki ŭ vas zbroi i bojeprypasaŭ. Heta pra toje, ci hatovyja vy vajavać i pamirać.

Dobra, u vas jość kanadskaja bryhada ŭ Łatvii. Jaki zahad u hetaj bryhady? Ci adkryjuć jany ahoń, kali rasijanie pierasiakuć miažu? My viedajem adkaz. Vy budziecie tydniami raicca.

Ja nie razumieju, jak možna surjozna abmiarkoŭvać ździełku, składzienuju biznes-partnioram Trampa!? Heta ryełtarskaja ździełka, kab uzbahacić siamju Trampa i pradać Ukrainu! Jak možna surjozna abmiarkoŭvać, što Ukraina pavinna budzie addać umacavańni [umacavany rajon Słavianska, Kramatorska i hary Karačun], jakija ratujuć Jeŭropu!?

Vy śviatkujecie hadavinu NATA… NATA słaboje, NATA nie isnuje, heta fejk, heta prosta čatyry litary: «N», «A», «T», «A».

Pryčyna, pa jakoj vy ŭsio jašče siadzicie tut i śviatkujecie tut, — heta toje, što ŭkraincy pamirajuć [za vas] kožnuju chvilinu. Heta vielizarnaje samaachviaravańnie! Kali b Ukraina nie vystajała, rasijskija tanki ŭžo byli b u Polščy!

Vy ŭsie ličyli, što Ukraina zdasca. Vy prapanoŭvali Zialenskamu evakuacyju. A jon skazaŭ: mnie nie treba evakuacyja, mnie treba zbroja.

Čatyry hady Ukraina vajuje za ŭsiu Jeŭropu! NATA byŭ stvorany dla adnoj vajny — nie dla Afhanistana, nie dla Siryi — dla adnoj zadačy: źbierahčy svabodnuju Jeŭropu ad rasijskaj ahresii.

Ukraina — adzinaja kraina, jakaja vajuje, a my ŭsio jašče abmiarkoŭvajem: prymać ich u NATA ci nie!? Ukraina — adzinaja kraina, jakaja vykonvaje toje, dla čaho stvarali NATA! I my abaviazanyja im usim. Ale ž nie, davajcie imi achviarujem!

Zialenski staić pierad takim vybaram, ja… navat nie viedaju, jak rastłumačyć heta. Jak rasijski hramadzianin ja taksama adčuvaju svaju vinu, tamu nie mahu paraić jamu pasłać Trampa kudy dalej.

Kolki sienataraŭ u nas tut? Chto-niebudź źbirajecca skazać Donaldu Trampu, što jon nie pavinien hetaha rabić!? U vas 85 hałasoŭ, 85 — heta bolš, čym 2/3, to čamu hety zakonaprajekt usio jašče znachodzicca dzieści pad stałom u Sienacie i jaho ŭsio jašče nie pryniali!?

Pucin, Si Czińpin, astatnija — jany śviatkujuć heta! A ŭ Rasii — paŭnočnakarejcy, kubincy, afrykancy-«vałanciory». I my ŭsio jašče havorym pra eskałacyju!?

Na našym baku ŭsio — vajskovaja, palityčnaja, ekanamičnaja siła, a my ŭsio jašče prajhrajem vajnu.

Dziakujučy Ukrainie Rasija ŭsio jašče nie vykanała pucinskaj mary pra restaŭracyju Rasijskaj Impieryi. Ale kali, nie daj boh, Ukrainu vymusiać pajści na takuju «ździełku», to absalutna jasna, što Pucin realizuje svaju maru.

A vy, chłopcy, [budziecie] nastupnyja. Tolki zmahacca vy nie hatovyja», — zajaviŭ Hary Kasparaŭ.

Kamientary da artykuła