«Dzieści dakładna jość prachod da našych dźviarej». Jak budoŭla paŭpłyvała na žyćcio najbolšaj tusovačnaj vulicy Minska

U sacsietkach ciapier tolki i razmoŭ pra toje, što na adnoj z hałoŭnych tusovačnych vulic Minska — Kastryčnickaj — pierakapali pałovu darohi. Rabotniki miascovych kaviarań zdymajuć paciešnyja roliki ŭ sacsietkach, skačučy z talerkami vaflaŭ i baršču praz budaŭničyja tranšei. Žurnalist vydańnia Office Life taksama prahulaŭsia pa papularnaj vulicy z hrafici i pahladzieŭ, što tam adbyvajecca.

Fota: Office Life

Na Kastryčnickaj ciapier sapraŭdy davodzicca łaviravać pamiž jamami i budaŭničaj technikaj. Tut na ŭsiu moc idzie ramont: pravodziać rekanstrukcyju ciepłasietak. Zakazčyk — «Minskenierha».

— Raboty pačalisia jašče letam — tady heta byŭ nievialiki ŭčastak, ale ŭvosień ramont staŭ bolš maštabnym: vykapali vielizarnuju tranšeju — tut jana jašče doŭha budzie, — pakazvaje na budoŭlu pierad uvachodam supracoŭnik adnoj z kaviarniaŭ.

Fota: Office Life

U miascovych rabočych pa terminach krychu bolš kankretyki:

— Mianiajem parapravod. Da kanca śniežnia dakładna. Potym tut zojmucca ŭparadkavańniem, skončać nie raniej čym da sakavika. Ale hetym užo buduć inšyja zajmacca.

— A jak kaviarni ramont pieražyvajuć? Skardziacca?

— Nakolki viedajem, nijakija ŭstanovy praz ramont nie zakryvalisia.

Fota: Office Life

Na pašparcie abjekta budoŭla ŭvohule zapłanavanaja da maja.

Fota: Office Life

Ale, niahledziačy na ekstremalnyja dla piešachodaŭ umovy, vulica praciahvaje žyć. U miascovyja kaviarni pa-raniejšamu možna dabracca jak pieššu, tak i na mašynie. Choć tut treba być napahatovie: na adnym z učastkaŭ žurnalist ledź nie straciŭ telefon — časovy most nad jamaj akazaŭsia chistki. Zrešty, znajści haračy čaj i surazmoŭcu daroha praz brud sa śnieham nie pieraškodziła.

— Ustanovy z abodvuch bakoŭ pracujuć pavodle svajho hrafika — zakrylisia tolki «siezońniki», — kaža supracoŭnica kaviarni Pane. — Praŭda, da niekatorych ź ich ciapier treba šukać padychod. Moža, dniom i stała mienš ludziej, ale da viečara vulica zapaŭniajecca.

Fota: Office Life

I praŭda, u abied znajści volny stolik akazałasia nieskładana. U hety čas tut šmat kurjeraŭ słužby dastaŭki, ale raz-poraz bačnyja i parački na špacyry.

Pra situacyju ŭ sacsietkach vykazałasia i ŭładalnica minskaha kafe-bara «Biełamur», viadomaja jak Ciamčyta:

— Kali vam budzie zdavacca, što da nas nie dajści z-za raskopak, viedajcie: dzieści dakładna jość prachodzik da našych dźviarej, pracujem u raniejšym režymie.

Fota: Office Life

Uviečary karcina pamianiałasia na 180 hradusaŭ: budoŭla byccam adyšła na druhi płan, stoliki ŭ kaviarni zapoŭnilisia, i zdajecca, što amataraŭ vulicy z hrafici nie asabliva biantežyć toje, što adbyvajecca navokał.

Fota: Office Life

Kamientary da artykuła