U Respublicy Sierbskaj pieramoh prateže Miłarada Dodzika
Pieramožcam daterminovych prezidenckich vybaraŭ u Respublicy Sierbskaj, jakaja ŭvachodzić u skład Bośnii i Hiercahaviny, staŭ kandydat sierbskich sieparatystaŭ — były ministr unutranych spraŭ Siniša Karan, jaki źjaŭlajecca davieranaj asobaj źmieščanaha baśnijska-sierbskaha lidara Miłarada Dodzika, piša Deutche Welle.
Siniša Karan i Miraład Dodzik. Fota: instahram Miłarada Dodzika
U pačatku žniŭnia miascovaja Centralnaja vybarčaja kamisija adchiliła Dodzika ad pasady prezidenta Respubliki Sierbskaj, jakuju jon zajmaŭ amal dva dziesiacihodździ.
«Pa papiarednich, nieaficyjnych i niapoŭnych vynikach, Siniša Karan atrymaŭ 50,89 pracenta hałasoŭ», — paviedamiŭ poźnim viečaram u niadzielu, 23 listapada, staršynia Centralnaj vybarčaj kamisii Jovan Kałaba. Jaho hałoŭny kankurent, kandydat ad najbujniejšaj apazicyjnaj partyi Branka Błanuš atrymaŭ 47,8% hałasoŭ.
U toj ža dzień raniej staršynia partyi niezaležnych sacyjał-demakrataŭ SNSD Miłarad Dodzik, jaki daŭno imkniecca da adździaleńnia Respubliki Sierbskaj ad dziaržavy Bośnija i Hiercahavina, pavinšavaŭ svaju davieranuju asobu Sinišu Karana ź pieramohaj.
«Naša palityka zaŭsiody była jasnaj i pryśviečanaj Respublicy Sierbskaj i narodu, i mnie pryjemna, što bolšaść narodu prahałasavała tak — dała padtrymku Sinišu Karanu, SNSD i našym kaalicyjnym partnioram. Asabista heta ŭsprymaju, jak padtrymku mnie.
U najskładaniejšych abstavinach jany (apanienty) chacieli źvierhnuć Dodzika, u niesumlennym palityčnym sudovym pracesie, ciapier jany atrymali dvuch Dodzikaŭ, jakich ciapier buduć bačyć štodnia», — zajaviŭ lidar baśnijskich sierbaŭ na bryfinhu ŭ partyjnym štabie.
Da vybaraŭ 23 listapada mahli być dapuščanyja 1,2 młn vybarščykaŭ u Respublicy Sierbskaj. Pieramožca vybaraŭ budzie zajmać pasadu tolki kala adnaho hoda, bo ŭ kastryčniku 2026 hoda ŭ Bośnii i Hiercahavinie adbuducca ahulnanacyjanalnyja parłamienckija i prezidenckija vybary.