Mancior linij vysokaha napružańnia z Pružan raskazaŭ pra pazityŭny vynik piaci hadoŭ biez seksu

Rańni šlub, razvod, niaŭdałyja sproby adnosin — niaščaści na luboŭnym froncie prymusili manciora linij vysokaha napružańnia Aleha z Pružan zadumacca: a moža, reč u mnie? Tak jon adroksia ad seksu i zaniaŭsia samaraźvićciom i terapijaj. Što z hetaha vyjšła, jon raskazaŭ «Našaj Nivie».

Aleh, fota z asabistaha archiva hieroja.

Aleh naradziŭsia ŭ Pružanach, pracavaŭ inžynieram-kanstruktaram. Pieršy šlub u mužčyny zdaryŭsia amal hetak ža chutka, jak i nadyšoŭ dzień raźbiahańnia z žonkaj u roznyja baki.

«My paznajomilisia na viasielli ŭ siabra, jana była siastroj niaviesty. I niedzie praź miesiac ažanilisia. Joj było 18, mnie — 20. Jana — karaleva dramy, a jon — narcys. Mazhi ŭ hałavie adsutničali paprostu», — dadaje kantekstu chłopiec.

Para raźbiehłasia praź dzieviać miesiacaŭ šlubu, i choć jašče paru hod nie razvodziłasia, nijakich uzajemaadnosin nie mieła. U žyćci Aleha pačałasia čarada niaŭdałych sprob pabudavać novyja adnosiny. Tak ciahnułasia da 2020 hoda.

«U peŭny momant ja zrazumieŭ, što prosta niešta nie tudy idu. Uvohule pa žyćci — mnie jano nie padabałasia. Zdavałasia, kali niešta nie pačać mianiać, to mnie adna daroha — na mohiłki. Tady ja spačatku kinuŭ palić, potym pić. U mianie pačałasia ŭnutranaja pierarobka, i tut było nie da seksu — było čym zaniacca, — raskazvaje Aleh.

«Ja asensavaŭ, što raniej byŭ sapraŭdnym mudakom u stasunkach. Mnie adna znajomaja raskazała pra svaich byłych: adzin hrošy vyprošvaŭ, druhi na emacyjnych arelach hajdaŭ, treci jašče niešta. A ja pabyvaŭ kožnym ź ich. Tamu dla siabie vyrašyŭ uziać paŭzu, kab razabracca sa svaimi prablemami».

Dva hady Aleh pracavaŭ nad saboj samastojna, potym pajšoŭ u terapiju. Patreba ŭ fizičnaj blizkaści była, ale vyratoŭvali indyvidualnyja praktyki.

«Vyratavańnie tapielcaŭ — sprava ruk samich tapielcaŭ», — žartuje surazmoŭca.

«Byli, kaniečnie, akazijanalnyja sproby dzieści na imprezach pačać kamunikacyju ź dziaŭčynami, ale ŭ mianie nie było žadańnia ŭkładvać u heta resursy. Praz try hady ŭstrymańnia ja zrazumieŭ, što seks dla mianie nie hałoŭnaje. I što ja nie šukaju stasunkaŭ dziela seksu, ja šukaju zdarovyja, adekvatnyja stasunki. A ŭ takich i seks prysutničaje pa zmoŭčvańni».

Aleh pryznajecca, što vyjaviŭ dla siabie, što vakoł šmat pryhožych žančyn i narmalnych mužčyn taksama žyvuć biez seksu i stasunkaŭ.

«I jany narmalna siabie adčuvajuć. Usie takija vakoł: «A što ž ty takaja pryhožaja i biez mužyka?» A jano, moža, nie vartaje taho. Bo kali vakoł takija, u jakich u hałavie pierakaci-pole, to navošta taki mužyk? Hetak ža pracuje ŭ i advarotny bok».

Mužčyna emihravaŭ ź Biełarusi pa palityčnych pryčynach u 2023 hodzie. Jaho maci zatrymlivali, i taja pierabrałasia razam ź inšym synam u Polšču jašče na hod raniej.

Pieršy čas Aleh uładkoŭvasia na novym miescy. Pracavać praciahnuŭ pa inžyniernaj śpiecyjalnaści, ale siadzieńnie ŭ ofisie chutka nadakučyła, tamu jon źmianiŭ prafiesiju na manciora na linijach vysokaha napružańnia. A ŭ 2025 hodzie adčuŭ i psichałahičnyja ŭnutranyja pieramieny.

«Možna skazać, što ja narešcie prapracavaŭ staryja traŭmy. Adbyłasia hłabalnaja ŭnutranaja pierabudova, usio raskłałasia pa paličkach. Ja ciapier spakajniejšy ŭ razy na kantraście z saboj ź minułaha. Nu i, skažam tak, u mianie jość pierakananaść u tym, što mnie patrabujecca ad adnosin. Ja sfarmulavaŭ heta ŭ troch słovach: empatyja, padtrymka i pavaha. Ja šukaju dla siabie žančynu-partniorku, i dakładna razumieju, jak heta pavinna vyhladać».

Praŭda, apynułasia, što pastaŭlenaja zadača — nie ź lohkich.

«Tak zvanyja ekśpierty ŭ stasunkach ź internetu adrazu kazali mnie, što maje farmuloŭki pra adnosiny — heta standartny nabor siabra.

Ci voś jašče taki niuans: praz toje, što ja ŭvieś čas u kamandziroŭkach — 20‑25 dzion na miesiac jezdžu pa Polščy, ja nie zdymaju sabie asobnuju kvateru, a na vychodnych žyvu z maci i bratam. I kali kažaš dziaŭčynam pra heta, jany ŭžo nie dasłuchvajuć pryčynu, adrazu takija: «Oj usio, davaj da pabačeńnia». Ja dla ich mamčyn synočak».

Dla pošukaŭ patencyjalnaj partniorki Aleh karystajecca «Cindaram», «Badu», a taksama ŭ vychodnyja adpraŭlajecca na palavańnie pa kaviarniach i barach.

«Za paŭtara miesiacy ŭ dadatkach znajomstvaŭ ja schadziŭ na spatkańni nul razoŭ», — pryznajecca surazmoŭca i adznačaje, što jamu bližej žyvaja kamunikacyja.

Mienavita pieryjadyčnaje naviedvańnie adnaho bara pryniesła jamu pieršy za piać hod seks ź dziaŭčynaj, jakaja taksama zavitvała za tuju ž stojku.

«My adrazu damovilisia, što heta razavaja akcyja, biez abaviazkaŭ. Atrymałasia jakasna, nie było tak, što niechta abłažaŭsia ci niešta takoje. Za piać hod adsutnaści seksu ŭ jaho pracesie dla mianie ničoha nie źmianiłasia. Usio było pa-staromu — jak ad pačatku čałaviectva, — dzielicca ŭražańniami paśla pieraryvu Aleh i dadaje: — Niechta moža pačać asudžać zaraz: aha, šukaje stasunkaŭ, a tut seks na adnu noč». Ale ž ja čałaviek, čamu nie?»

Tym bolš, kaža mužčyna, jon asensoŭvaje, što znajści žančynu mary jon chutka nie zdoleje.

«Kab była takaja, jakaja, jak i ja, taksama chacieła b empatyi, pavahi i padtrymki (a ŭ ideale jašče rudaja i nie plus-sajz — tut prosta prabačcie, nie majo) — heta amal jak znajści adnaroha».

Kab nablizić čakany momant, Aleh znoŭ viarnuŭsia ŭ terapiju, dzie dalej prapracoŭvaje navyki.

Kamientary da artykuła