Brytanka adpraviłasia ŭ ZŠA z namieram znajści hvałtoŭnuju śmierć. I ŭ jaje atrymałasia

Žančyna paznajomiłasia sa svaim zabojcam u tematyčnym čacie dla amataraŭ fietyšaŭ i prylacieła da jaho ŭ Fłarydu, kab jon vykanaŭ jaje žachlivaje žadańnie — žorstka zabić jaje. Praź niekalki dzion jaje cieła znajšli zakapanym u lesie, a apošnija chviliny žyćcia žančyny akazalisia zafiksavanymi na videa.

Sonia Eksełbi. Fota: sonia.exelby / Facebook

32‑hadovaja stvaralnica ličbavaha kantentu z brytanskaha Portsmuta Sonia Eksełbi (Sonia Exelby), mieła dakumientalna paćvierdžanyja prablemy ź psichičnym zdaroŭjem. Adnak sapraŭdny maštab jaje stanu raskryŭsia tolki paśla śmierci: vyvučyŭšy kampjutar žančyny, palicyja znajšła dokazy taho, što jana šukała ŭ internecie ludziej, hatovych žorstka jaje zabić. Z padrabiaznaściami znajomić Daily Mail.

Prykładna za dva hady da trahiedyi ŭ tematyčnym čacie dla amataraŭ fietyšaŭ Sonia paznajomiłasia z žanatym baćkam dvaich dziaciej 53‑hadovym amierykancam Duejnam Chołam (Dwain Hall). U siecivie jon vykarystoŭvaŭ nik «alphasadist».

Pa słovach Choła, Sonia raskazvała jamu pra svajo žadańnie pamierci, ale jon sprabavaŭ jaje adhavaryć. Tym nie mienš ich kamunikacyja pryviała da taho, što Sonia spłanavała pajezdku ŭ ZŠA, kab sustrecca.

10 kastryčnika Sonia Eksełbi vylecieła z łondanskaha aeraporta Chitroŭ u Fłarydu. Jana mieła zvarotny bilet na 13 kastryčnika. Pierad vyletam žančyna sa svajoj bankaŭskaj kartki apłaciła arendu žylla praz Airbnb u akruzie Meryjan, štat Fłaryda. Duejn Choł sustreŭ Soniu ŭ aeraporcie i advioz jaje ŭ zahadzia apłačanaje žyllo.

Kali 13 kastryčnika Sonia nie viarnułasia ŭ Vialikabrytaniju, jaje siamja i chłopiec Styŭ Chant zabili tryvohu i paviedamili pra jaje źniknieńnie. Styŭ apublikavaŭ u instahramie emacyjny post ab dapamozie, u jakim napisaŭ:

«My ličym, što jana damoviłasia sustrecca tam z kimści i trapiła ŭ nadzvyčaj uraźlivuju situacyju».

U hety ž čas Sonia adpraŭlała siabram u Vialikabrytaniju praź miesiendžar Discord tryvožnyja paviedamleńni. U hetych «doŭhich i biazładnych», pavodle palicyi, tekstach jana pisała:

«Prabačcie, jon uvieś čas zabiraje moj telefon… Jon daŭ zrazumieć, što vyjścia niama, kali ja nie zastrelu jaho… Ja nie mahu nikoha zabić… Mnie tak strašna, ja takaja raźbitaja i mnie tak baluča».

Apošnija momanty žyćcia Soni byli zafiksavanyja na videa, jakoje, jak miarkuje palicyja, Choł zrabiŭ, kab abaranić siabie ad abvinavačvańniaŭ. Na videa vidavočna zasmučanaja Sonia siadzić na kreśle sa šmatlikimi siniakami na tvary, šyi i hrudziach. Choł pytajecca ŭ jaje, čamu jana ŭ ZŠA, na što žančyna sa ślazami adkazvaje: «Tamu što ja žachlivy čałaviek. Ja złamała kožnaha, chto mianie kali-niebudź lubiŭ».

Dalej jon pytajecca, jak jana choča pamierci. Spačatku Sonia admaŭlajecca adkazvać, ale potym kaža: «Ja chaču, kab mianie ŭdaryli nažom». Choł udakładniaje: «Heta toje, jak ty chacieła pamierci, tak?», i jana kivaje. Na pytańnie, ci prymušajuć jaje rabić niešta suprać jaje voli, jana admoŭna chitaje hałavoj.

Duejn Choł. Fota: Turma akruhi Maryjon / ladbible.com

Padčas dopytu Choł pryznaŭsia, što ŭ ich z Soniaj byŭ seksualny kantakt, jaki, pavodle jaho słoŭ, inicyjavała jana. Pakul palicyja dapytvała Choła, cieła Soni było znojdziena ŭ niehłybokaj mahile ŭ lasnym masivie. Jaje asobu vyznačyli pa adbitkach palcaŭ.

Dokazy suprać Choła byli nieabvieržnymi. Padčas pieratrusu ŭ jaho domie palicejskija znajšli rydloŭku, ślady hleby ź jaje supali z hlebaj ź miesca pachavańnia Soni. Bolš za toje, na ručcy instrumienta była znojdziena jaje kroŭ.

Śledčym taksama ŭdałosia vyjavić i mierkavanuju zbroju zabojstva — nož. Choł sprabavaŭ pazbavicca ad jaho, adpraviŭšy pa pošcie svajmu siabru. Analiz DNK paćvierdziŭ, što ślady kryvi na lazie naležać Soni Eksełbi. Narešcie, vysnovy śledstva byli padmacavanyja vynikami sudmiedekśpiertyzy, jakaja vyznačyła, što pryčynaj śmierci žančyny stali čatyry nažavyja ranieńni.

Palicyja ličyć, što videazapis byŭ sprobaj Choła stvaryć iłžyvaje ŭražańnie, byccam usio adbyvałasia pa zhodzie achviary, kab paźbiehnuć adkaznaści za vykradańnie i zabojstva. 17 listapada mužčyna byŭ aryštavany. 

Kamientary da artykuła