Viciebskaja fabryka vypuściła dyvany z matroškami
Kampanija «Viciebskija dyvany» prezientavała novuju kalekcyju, stvoranuju «pa matyvach słavianskaha mastactva». Na dyvanach — matroški i ŭzory chachłamy. Navinka vyklikała nieadnaznačnuju reakcyju ŭ sacyjalnych sietkach.
Novyja viciebskija dyvany. Skryn videa: vitcarpet_belarus / Instagram
Novyja viciebskija dyvany majuć kruhłuju formu i pamier mietr na mietr. Usiaho šeść dyzajnaŭ: try matroški i try chachłamy.
«Sakavityja, jarkija, dyzajnierskija dyvany. Vy ich možacie pakłaści ŭ dziciačy pakoj ci vykarystoŭvać jak vielmi jarki interjerny elemient», «Kalekcyja z notkami nastalhii pa dziacinstvie» —
śćviardžajuć u rekłamnych rolikach i paviedamlajuć, što novuju pradukcyju možna nabyć jak praz sajt, tak i ŭ firmiennych kramach u Minsku.
Mnohich źbiantežyła, što vybrali simvały, jakija nie asacyjujucca ź Biełaruśsiu.
«A ci nie łahičniej spačatku vyrabić dyvany z matyvami svajoj krainy?» —
zadajucca pytańniem u kamientarach da rekłamy.
Niechta vykazaŭsia bolš emacyjna:
«Vielmi dziŭna bačyć taki dyzajn. Čamu nie naša nacyjanalnaja tematyka? Našy arnamienty našmat pryhažejšyja».
Na hetuju zaŭvahu akaŭnt «Viciebskich dyvanoŭ» adkazaŭ:
«Čym ža matroški nie nacyjanalny simvał?»
Fabryka zaŭvažyła taksama, što ŭ ich jość i inšyja kalekcyi.
Adzin z kamientataraŭ daje razhornutaje tłumačeńnie, čamu abranyja simvały nie majuć dačynieńnia da biełaruskaj kultury:
«Matroška — typova rasiejski suvienir, jaki źjaviŭsia ŭ Padmaskoŭi naprykancy XIX stahodździa. Chachłama — heta rasiejski narodny rośpis ź Nižaharodskaj hubierni (XVII stahodździe).
U biełaruskaj tradycyjnaj kultury jość svaje ŭłasnyja simvały i ramiostvy, jakija nijak nie źviazanyja z hetymi rasiejskimi artefaktami. Naprykład, słuckija pajasy, sałomaplacieńnie, biełaruskija ručniki z čyrvona-biełaj vyšyŭkaj, kieramika i arnamienty, što iduć jašče z dachryścijanskich časoŭ. Kali łaska, nie vydavajcie rasiejskuju kulturu za biełaruskuju».
Niekatoryja sprabujuć zrazumieć łohiku vytvorcy. Adno ź mierkavańniaŭ — raźlik na rasijski rynak.
«Baču, što apošnim časam našy vytvorcy stali aryjentavacca na rasijskich pakupnikoŭ», «Dla turystaŭ z susiedniaj krainy», «Heta, vidać, pradukcyja na ekspart».
A byli i tyja, kamu novaja kalekcyja pryjšłasia daspadoby:
«Kłasnyja. Treba brać!», «Vielmi simpatyčnyja matroški! Takija pad nohi nie kinieš!», «U mianie syn abažaje matrošak. Mnie takaja patrebnaja», «Tak pryjemna bačyć, što biełaruskija kampanii sočać za trendami i apieratyŭna vypuskajuć navinki».
Čytajcie taksama:
Minčanka šyje bombiery z babulinych pościłak — ceny ad 100 dalaraŭ
U Haradku pryvatnik adkryŭ syravarniu. Jakija zarobki prapanuje?
MTZ u 2026 hodzie vypuścić čatyry novyja madeli siakier, adnu z padoŭžanaj ručkaj