Tusk: Dyviersiju na čyhuncy arhanizavali dvoje ŭkraincaŭ, jany vyjechali ŭ Biełaruś
Dyviersii pavinny byli pryvieści da katastrofy ŭ čyhunačnym ruchu.
Premjer-ministr Polščy Donald Tusk zajaviŭ, što dyviersii na čyhuncy ździejśnili dvoje hramadzian Ukrainy, jakija supracoŭničajuć z rasijskaj raźviedkaj. Mužčyny ŭciakli z Polščy ŭ Biełaruś praz pamiežny pierachod u Tarespali.
Tusk paviedamiŭ, što adzin ź ich u mai byŭ asudžany sudom u Lvovie za akty dyviersii na terytoryi Ukrainy. Druhi pachodzić z Danbasa.
Pavodle jaho słoŭ, na hetym etapie dziejańniaŭ śpiecsłužbaŭ jon nie moža paviedamić hramadskaści bolš padrabiaznyja danyja pra dyviersantaŭ.
Tusk raskazaŭ, što paśla vybuchu ŭ rajonie vioski Mika mužčyny vyjechali z krainy praz polska-biełaruski pierachod u Tarespali. Jak jon dadaŭ, zrabili jany heta tady, kali nie byli jašče identyfikavanyja słužbami.
Kiraŭnik polskaha ŭrada dadaŭ, što śpiecsłužby majuć peŭnaść: sproba padryvu šlachoŭ u vakolicach vioski Mika i parušeńnie infrastruktury čyhunki pad Pułavami — heta dva akty dyviersii, jakija mieli davieści da katastrofy ŭ čyhunačnym ruchu.