Syrski: Rasijanie niasuć na froncie kala Pakroŭska značnyja straty

Rasijskija vojski niasuć značnyja straty na froncie kala horada Pakroŭsk, jaki zastajecca klučavym napramkam ich nastupu. Dziejańni USU na susiednim ačarecinskim napramku pamiž Dabrapollem i Kanstancinaŭkaj prymušajuć voraha raściarušvać siły i nie dajuć jamu skancentravać asnoŭnyja vysiłki na Pakroŭsku, paviedamiŭ hałoŭnakamandujučy USU Alaksandr Syrski.

Alaksandr Syrski. Fota: Facebook

Pa słovach Alaksandra Syrskaha, u Pakroŭsku i jaho vakolicach efiektyŭna dziejničajuć ukrainskija abaroncy ź miechanizavanych vojskaŭ, bryhad desantna-šturmavych vojskaŭ, 425‑ha asobnaha šturmavoha pałka, apieratary bieśpiłotnych sistem i inšyja padraździaleńni. Rasijanie praciahvajuć nieści straty jak u žyvoj sile, tak i ŭ technicy. Ich šturmavyja hrupy i miescy ich kancentracyi vyjaŭlajucca i źniščajucca.

Asablivaja ŭvaha nadajecca ŭmacavańniu padraździaleńniaŭ na hetym napramku, zabieśpiačeńniu vojskaŭ usim nieabchodnym i ŭmacavańniu łahistyčnych maršrutaŭ. Aktyŭnyja dziejańni na ačarecinskim napramku nie dazvalajuć vorahu kancentravać asnoŭnyja siły ŭ rajonie Pakroŭska. Za čas apieracyi ŭžo vyzvalena 189 km² terytoryi i 257,7 km² ačyščana ad dyviersijna-raźviedvalnych hrup rasijskaj armii.

Na hulajpolskim i arechaŭskim napramkach u Zaparožskaj vobłaści rasijanie nadalej sprabujuć źniasilvać ukrainskija padraździaleńni masavanymi abstrełami i dziejańniami małych šturmavych hrup, ale taksama i tam niasuć vialikija straty. USU błakujuć i robiać kompleksnyja ahniavyja ŭdary pa akupantach kala nasielenych punktaŭ Jabłykava, Viasiołaje i Sałodkaje, a taksama robiać pošukava-ŭdarnyja dziejańni suprać varožych dyviersijnych hrup. Za apošni dzień u zonie dziejańniaŭ ukrainskaj hrupoŭki «Poŭdzień» rasijanie, pa słovach Alaksandra Syrskaha, stracili 239 čałaviek i 43 adzinki techniki.

Syrski taksama paviedamiŭ pra naroščvańnie ŭdaraŭ pa abjektach na terytoryi Rasii i časova akupavanych terytoryjach Ukrainy. Z pačatku listapada, pa jaho słovach, stratehična (Deep Strike) byli źniščanyja 33 abjekty voraha, a na apieratyŭnym uzroŭni (Middle Strike) — 41. Dla kompleksnych udaraŭ vykarystoŭvajucca srodki dalnich udaraŭ ukrainskaj raspracoŭki: «Fłaminha», «Bars» i «Luty».

Kamientary da artykuła