Cichanoŭskaja i Marynič źviarnulisia da ŭrada Partuhalii z prośbaj dapamahčy biełaruskim imihrantam

Kiraŭnictva Abjadnanaha pierachodnaha kabinieta i misii demakratyčnych sił źviarnułasia da ŭrada Partuhalii z prośbaj dapamahčy biełaruskim imihrantam paśla taho, jak u partuhalskim zakanadaŭstvie adbylisia źmieny, što ŭskładnili niekatorym ź ich padaŭžeńnie dazvołu na žycharstva, paviedamlaje Reform.news.

Śviatłana Cichanoŭskaja padčas pajezdki ŭ Partuhaliju. Fota: pres-słužba Śviatłany Cichanoŭskaj

11 listapada Śviatłana Cichanoŭskaja, kiraŭnica Abjadnanaha pierachodnaha kabinieta, i Taćciana Marynič, kiraŭnica misii demakratyčnych sił u Madrydzie i Imaguru Hub, vystupili na Web Summit u Lisabonie.

Jany padkreślili, što apošnija źmieny ŭ zakonie ab hramadzianstvie Partuhalii zrabili mnohim biełarusam praktyčna niemahčymym zastavacca ŭ krainie lehalna abo padoŭžyć termin dziejańnia dazvołu na žycharstva.

Taćciana Marynič zaklikała partuhalski ŭrad praciahvać padtrymlivać biełaruskich pradprymalnikaŭ i akazvać im jurydyčnuju i instytucyjnuju dapamohu. Heta, na jaje dumku, dazvolić biełarusam napoŭnicu ŭdzielničać u žyćci i ekanomicy Partuhalii, rabić svoj uniosak i raźvivać biznes u krainie.

Raniej u ramkach hetaj inicyjatyvy Ofis Śviatłany Cichanoŭskaj nakiravaŭ aficyjny zapyt partuhalskim uładam pa prablemach, jakija ŭźnikli padčas sustreč ź biełarusami, u tym liku pa pytańniach dazvołu na žycharstva i lehalnaha znachodžańnia ŭ krainie.

Prablema ŭźnikła paśla taho, jak u Partuhalii admianili časovy abarončy status dla niekatorych hramadzian Biełarusi, jakija prybyli z Ukrainy paśla pačatku poŭnamaštabnaha ŭvarvańnia Rasii i atrymali tut časovy prytułak. Hetyja asoby pavinny dobraachvotna pakinuć Partuhaliju ciaham 20 dzion, inakš ich mohuć departavać.

Kamientary da artykuła