Roŭna piać hadoŭ tamu zahinuŭ Raman Bandarenka
Raman pamior 12 listapada 2020 hoda ŭ vyniku žorstkaha źbićcia.
Jaho źbili i zatrymali napiaredadni 11 listapada na Płoščy Pieramien u Minsku, a paśla zabrali ŭ RUUS Centralnaha rajona. Adtul mužčyna trapiŭ u Balnicu chutkaj dapamohi z aciokam hałaŭnoha mozhu i šmatlikimi traŭmami, dzie praź niekalki hadzin pamior.
Jaho apošnimi słovami viečaram 11 listapada byli: «Ja vychodžu». Śmierć Ramana, jakomu byŭ 31 hod, uskałychnuła ŭsiu Biełaruś.
Ułady chacieli pierakanać, što jon byŭ pjany, ale daktary ŭ jaho kryvi nie vyjavili ałkaholu.
Dziakujučy źlitym zapisam razmoŭ i bilinhu telefonaŭ, stała viadoma, što siarod prysutnych na Płoščy Pieramien u toj viečar byli pres-sakratarka Łukašenki Natalla Ejsmant, eks-kiraŭnik biełaruskaj Fiederacyi chakieja, a ciapier sienatar Dźmitryj Baskaŭ, kikbaksior, jaki treniravaŭ SACHR, Dźmitryj Šakuta.
Siońnia a 19‑j kala pasolstva Biełarusi ŭ Vilni projdzie akcyja pamiaci Ramana Bandarenki. Arhanizatary prosiać prynieści łampadki, kvietki i partrety Ramana.