U Varoniežy drony atakavali CEC: u horadzie źnikała śviatło i ciapło
U noč na 9 listapada ŭ rasijskim Varoniežy adbyłasia ataka dronaŭ na miascovuju ciepłaelektracentral. Žychary horada paviedamlali pra vybuchi, paśla čaho ŭ niekatorych rajonach uźnikli prablemy z elektryčnaściu i aciapleńniem.
Pavodle hieałakacyi kadraŭ, jakija źjavilisia ŭ siecivie, pad ataku trapiła Varoniežskaja CEC-1 — najbujniejšy pastaŭščyk ciepłavoj enierhii ŭ horadzie. Stancyja zabiaśpiečvaje ciapłom čatyry rajony horada, a taksama bolš za tysiaču pradpryjemstvaŭ, u tym liku bujny zavod «Varoniežsintezkaŭčuk», piša kanał «Astra».
Hubiernatar Varoniežskaj vobłaści Alaksandr Husieŭ paćvierdziŭ fakt ataki, ale nie nazvaŭ abjekt ataki naŭprost. Jon napisaŭ, što praz ataku dronaŭ na adnym z kamunalnych abjektaŭ uźnikła ŭzharańnie, jakoje było apieratyŭna likvidavana.
Husieŭ dadaŭ, što z-za pažaru «ź mierkavańniaŭ technałahičnaj biaśpieki» byli pryniaty časovyja miery, u vyniku jakich u niekatorych damach naziralisia vahańni tempieratury centralnaha aciapleńnia, na karotki čas była prypyniena padača elektraenierhii na niekatoryja terytoryi horada.
U noč na 8 listapada RF ažyćciaviła adnu z najbujniejšych atak balistyčnymi rakietami na enierhietyčnyja abjekty Ukrainy. Učora viečaram paviedamlałasia pra błekaŭty ŭ Kijevie i Charkavie.