Staršynia parłamienta Čechii vykłaŭ videa, jak dapamahaje zdymać ukrainski ściah z budynka
Jon trymaje leśvicu, pakul inšy mužčyna spuskaje ściah.
Tomia Akamura trymaje leśvicu, pakul inšy mužčyna spuskaje ściah. Skrynšot videa
Novy staršynia Pałaty deputataŭ Čechii (nižniaj pałaty parłamienta) Tomia Akamura zahadaŭ źniać z parłamienckaha budynka ściah Ukrainy. Ściah visieŭ tam z 2022 hoda ŭ znak salidarnaści.
Videa śpikier apublikavaŭ u tvitary (ciapierašni Ch). Na videa jon trymaje leśvicu, pakul inšy mužčyna zdymaje ściah Ukrainy z budynku parłamienta Čechii.
«Češskaja respublika — pierš za ŭsio», — prakamientavaŭ śpikier hety ŭčynak.
Tomia Akamura — lidar pravapapulisckaj partyi SPD («Svaboda i pramaja demakratyja»).
U adkaz na jaho dziejańni inšyja deputaty vyviesili try ŭkrainskija ściahi na budynku češskaha parłamienta.
Adreahavaŭ i śpikier Viarchoŭnaj rady Ukrainy Rusłan Stefančuk. Jon nahadaŭ, što ŭkrainski ściah — heta simvał ich nacyi, hetym ściaham raźvitvajucca z ukrainskimi sałdatami, jakija zahinuli na vajnie suprać Rasii.
«Siońnia na im bačnyja šnary ad kul i ahniu bitvaŭ, ale jon pa-raniejšamu horda łunaje jak simvał svabody. Pa hetaj pryčynie jon zasłuhoŭvaje hłybokaj pavahi i ŭšanavańnia.
Voś čamu zryvańnie ŭkrainskaha ściaha z budynku jeŭrapiejskaha parłamienta, narod jakoha padtrymlivaje ŭkraincaŭ u hetaj spraviadlivaj baraćbie, źjaŭlajecca davoli sumniŭnym dasiahnieńniem… Navat kali ŭsio, što vy zrabili, — heta patrymali leśvicu»,
— napisaŭ Stefančuk u Ch.