Miedycynskaja zahadka: u žančyny niečakana pačaŭ dryžać pravy bok tvaru. Pryčynu vyjaviŭ tolki vośmy doktar

63‑hadovaja žančyna dva hady pakutavała ad niekantralujemych spazmaŭ tvaru. Jana naviedała vosiem roznych śpiecyjalistaŭ, atrymała dziasiatki injekcyj botaksu i navat źviarnułasia da akupunktury. I tolki ŭ adnoj klinicy znajšoŭsia doktar, jaki nie tolki pastaviŭ dyjahnaz, ale i pravioŭ paśpiachovaje lačeńnie.

Ilustracyjnaje fota: Rafa Fernandez Torres / Getty Images

Dziŭnaja historyja, ab jakoj raskazvaje The Washington Post, pačałasia ŭ studzieni 2022 hoda. Kali paśla čarhovaha vizitu da stamatołaha Typi Makinerni ź Miniesoty adčuła zdranćvieńnie pravaj ščaki, jana nie nadała hetamu vialikaha značeńnia.

Jana mierkavała, što jano projdzie praź dzień-druhi. Ale praź niekalki tydniaŭ źjaviłasia dziŭnaje adčuvańnie. Jak jana raskazvaje, «byccam niechta nadzieŭ na voka maleńki śvitar». Zaniepakojenaja svaim zrokam, jana źviarnułasia da akulista, jaki skazaŭ, što ŭsio vyhladaje dobra.

U sakaviku jaje stan pahoršyŭsia — pravaje voka raptam pačało bieśpierapynna mirhać, a pravy kutok rota pačaŭ mižvolna ciahnucca da ščaki. Bajučysia insultu, žančyna źviarnułasia ŭ pryjomnaje adździaleńnie balnicy. Ale testy ničoha nie pakazali.

Sama Makinerni ličyła, što sprava ŭ stamatałahičnaj aniestezii: mahčyma, heta prajava alerhii na preparat ci doktar začapiŭ nierv padčas ukołu. Jana pajšła da svajho terapieŭta, jaki adchiliŭ lubuju suviaź z pracaj stamatołaha i pryznačyŭ MRT hałavy.

Zatym Makinerni naviedała nieŭrołaha, jaki pastaviŭ dyjahnaz hiemifacyjalny spazm — redkaje parušeńnie, kali myšcy adnaho boku tvaru mimavoli skaračajucca pad uździejańniem kryvianosnaha sasudu, jaki ciśnie na nierv tvaru. Hety stan taksama moža być vyklikany puchlinaj, paškodžańniem nierva abo inšymi anamalijami.

Nieŭrołah pryznačyŭ MRT kryvianosnych sasudaŭ, jakoje, pa słovach śpiecyjalistaŭ, nijakich anamalij nie vyjaviła. Jon prapanavaŭ dva vidy lačeńnia: injekcyi botaksa, jakija mohuć časova zamarozić myšcy; abo supraćsutarhavyja preparaty, ci mijarełaksanty — leki, jakija mohuć pamienšyć spazmy.

Makinerni źviarnułasia da druhoha nieŭrołaha ŭ toj ža klinicy, jaki taksama prapanavaŭ botaks i mijarełaksanty.

Pakul dakładnaha tłumačeńnia nie znachodziłasia, žančyna pačała šukać dapamohu sama. Zamiest tabletak i botaksu źviarnułasia da akupunktury, źmianiła charčavańnie, vyklučyła kavu i małako. Spačatku zdavałasia, što dapamahaje: spazmy ścišylisia.

Žančyna źmianiła stamatołaha, kab praciahnuć lačeńnie zuboŭ. Novy śpiecyjalist adchiliŭ lubuju suviaź pamiž jaje spazmami i stamatałahičnymi manipulacyjami i paraiŭ źviarnucca da otałarynhołaha. Adnak i hety śpiecyjalist nie znajšoŭ ničoha drennaha i taksama vyklučyŭ suviaź sa stamatałahičnym lačeńniem.

Novaje abvastreńnie

U žniŭni 2023 hoda, paśla bolš čym hoda rehularnych sieansaŭ akupunktury, spazmy viarnulisia z novaj siłaj. Patorhvańni byli nastolki mocnyja, što ihołki padčas pracedury vyskokvali z tvaru.

Da kanca 2023 hoda dryžańnie stała vidavočnym dla ŭsich. Makinerni pačała paźbiahać siabroŭ i prykryvać tvar rukami na ludziach. «Ja zaŭsiody była ekstraviertam, ale ciapier zamknułasia», — kazała jana.

U rospačy jana zapisałasia ŭ kliniku Majo ŭ Ročestery, štat Miniesota, ale čakać daviałosia piać miesiacaŭ. Tam nieŭrołahi paćvierdzili dyjahnaz hiemafacyjalnaha spazmu bieź vidavočnaj pryčyny i prapanavali botaks. Jana pahadziłasia. Preparaty časova «zamarozili» ruchi, ale pad skuraj jana ŭsio roŭna adčuvała dryžańnie. Praź niekalki tydniaŭ efiekt ad ukołaŭ prajšoŭ.

Vyratavańnie

Pierałomny momant nastaŭ, kali ŭ lipieni 2024 hoda žančynu ahledzieŭ inšy śpiecyjalist kliniki Majo — niejrachirurh Fredryk Mejer. Heta ŭžo byŭ vośmy pa liku śpiecyjalist za dva hady. Jon uvažliva pahladzieŭ śviežy zdymak MRT i adrazu zaŭvažyŭ toje, što prapuścili inšyja: arteryja pryciskała nierv tvaru. Heta i vyklikała pastajannyja dryžańni. Śpiecyjalist taksama adchiliŭ suviaź z stamatałahičnymi manipulacyjami, zaŭvažyŭšy, što heta prosta supadzieńnie.

«Ja prosta viedaju, kudy hladzieć», — patłumačyŭ Mejer. «Pakolki heta maja vuzkaja śpiecyjalizacyja, ja bolš skancentravany na peŭnych miescach i bolš daśviedčany ŭ tym, što šukaju».

Mejer prapanavaŭ apieracyju — mikraskapičnuju dekampresiju sasudaŭ. Padčas čatyrochhadzinnaha ŭmiašańnia chirurhi adździalili arteryju ad nierva i ŭstavili pamiž imi achoŭnuju prakładku. Kali žančyna pračnułasia, spazmy źnikli.

Praz hod jany tak i nie viarnulisia. Makinerni znoŭ moža ŭśmichacca i spakojna kantaktavać ź ludźmi. Praŭda, žančyna straciła słych na pravaje vucha — ryzyka, pra jakuju jaje papiaredžvali. Vierahodnaść takoha scenaryja — 8%. Ale, pavodle jaje słoŭ, heta drobiaź u paraŭnańni z tym, jak raniej tvar žyŭ asobna ad jaje voli.

Kamientary da artykuła