Kab razdać kvitki na Šamana, padklučyli rajvykankamy. A jon zapisaŭ videa «Priviet, Biełoruśsija!» i śpiavaŭ himn Rasii
Kvitki na skandalnaha ruskamiraŭskaha śpievaka nie pradavalisia zusim nijak. Daviałosia ŭklučać administratyŭny resurs.
Skryn videa ŭ tyktoku
Pierad pryjezdam u Minsk Šaman zapisaŭ videa «Priviet, Biełoruśsija!», čym mnohich aburyŭ.
Adkazaŭ rasijaninu i biełaruski śpiavak AP$ENT — jon navat pryśviaciŭ Šamanu pieśniu.
Placoŭku dla vystupu ŭ Minsku Šaman vybraŭ nie samuju vialikuju. Pretendavać na «Minsk-Arenu» nie staŭ, spyniŭsia na Pałacy Respubliki, vialikaja zała jakoha źmiaščaje kala 2100 hledačoŭ. Pradadziena było pryblizna 80% kvitkoŭ — za niekalki hadzin da kancertu nie raskuplenyja byli bolš za 400 kvitkoŭ. Kaštavali jany ad 104 da 405 rubloŭ.
Skrynšot: ticketpro.by
Ale z tym, kab napoŭnić zału ludźmi, uźnikli składanaści. U sacyjalnych sietkach možna pabačyć kamientaryi, što prafsajuzy nastojliva prapanoŭvali kvitki biudžetnikam — ź istotnaj źnižkaj, ale z umovaj abaviazkova dajści da kancertu.
Hetuju ž infarmacyju paćvierdzili i krynicy «Našaj Nivy».
«Pieršapačatkova bilety nie pradavalisia, cikavaści nie było nijakaj. Była navat razmova z Vajskovaj akademijaj, kab rychtavali rezierv — heta značyć, kab tam vyłučyli ŭ dzień kancerta 100‑200 kursantaŭ, jakija zojmuć volnyja miescy. Potym puścili raznaradku pa rajvykankamach, kab vykupili kvitki i tam užo na miescach ich raźmiarkoŭvali. Minimalna na rajon treba było vykupić 30 biletaŭ».
Praihnaravali kancert prychilniki Łukašenki, jakija zvyčajna naviedvajuć vystupy lubych bolš-mienš papularnych rasijskich artystaŭ.
Navat siostry Hruździevy, jakija pryznajucca ŭ šalonaj lubovi da tvorčaści Šamana, zdradzili śpievaku. Jany pajšli zamiest hetaha na kancert Alaksandra Malinina, jaki vystupaŭ u kancertnaj zali «Minsk».
Ź biełaruskich sielebrycis na kancercie źjaviłasia maładaja biełaruskaja śpiavačka Nasta Kraŭčanka — i tolki praz toje, što jaje zaprasili vystupić tam. Sam Šaman nazvaŭ dziaŭčynu ŭpryhožańniem viečara.
U sacyjalnych sietkach davoli mała videa z kancerta Šamana — zdajecca, navat tyja, chto tam byŭ, nie vielmi chočuć afišavać heta.
U jakaści padarunka dla biełarusaŭ rasijski śpiavak, apranuty ŭ skuranyja štany dy atłasnuju kašulu, śpieŭ chit «Pieśniaroŭ» — «Biełaviežskaja pušča».
Praśpiavaŭ jon i svaju vizitoŭku — pieśniu «Ja russkij». Padčas jaje fonam na scenie hareła serca ŭ kolerach rasijskaha ściaha.
Potym u rasšpilenaj kašuli i vuzieńkich štanach artyst pačaŭ śpiavać himn Rasii.
Dziela spraviadlivaści varta adznačyć, što prychilniki Šamana ŭsio ž taksama byli. Fan-kłub artysta apublikavaŭ videa, jak jaho sustrakajuć na vychadzie z Pałaca Respubliki. Ludzi śpiavali: «Ja russkij, ja idu do konca!». Adna z žančyn kryčała: «Jarasłaŭ, my vas lubim! My z Dublina pryjechali!». Adnak ciažka acanić, kolki mienavita čałaviek zastałosia čakać aŭtohrafa Šamana.
Dalej u Šamana zapłanavanyja jašče niekalki kancertaŭ u Biełarusi — u Breście, Homieli i Hrodna. Tam kvitki bolš tannyja — ad 80 da 265 rubloŭ. Ale nie skazać, kab tam jany aktyŭna pradavalisia.
Skrynšot: ticketpro.by
Pieršy z rehijanalnych kancertaŭ adbudziecca ŭ Breście ŭ BAK pa hulniavych vidach sportu «Viktoryja» imia A.P. Miaškova 10 śniežnia. Vyhladaje, što kvitki nabyvajucca centralizavana. Bo kali heta robiać zvyčajnyja ludzi samastojna, jany vybirać roznyja miescy ŭ zali, i nie byvaje takoha, kab usiudy vykuplenaja raŭniusieńka pałova radu ci rad całkam.
U inšych haradach situacyja pryblizna hetkaja samaja.
Čytajcie taksama:
Śpiavačka Jołka prybrała z chita zhadvańnie kijeŭskaha aeraporta Baryspal na vystupie ŭ Maskvie