Uładalnik «Majontka Padarosk» ličyć niezakonnym aŭkcyjon pa prodažy siadziby. Jon nakiravaŭ pretenziju ŭ rajvykankam

Pradpryjemstva «Majontak Padarosk» nakiravała pretenziju ŭ adździeł kultury Vaŭkavyskaha rajona z patrabavańniem «spynić niezakonnaje vałodańnie i rasparadžeńnie čužoj majomaściu». Niezakonnym jaho robić najaŭnaść čužoj majomaści ŭ abjekcie prodažu, piša Hrodna.life.

Terytoryja Majontka Padarosk da taho, jak jaho zabrali va ŭłaśnika. Krynica: Google maps

Adździeł kultury Vaŭkavyskaha rajvykankama vystaviŭ na prodaž kanfiskavanuju ŭ Paŭła Padkarytava ŭ 2023 hodzie siadzibu ŭ ahraharadku Padarosk Hrodzienskaj vobłaści.

Siarod majomaści, što pradajecca, jość jak minimum adzin abjekt, jaki nie źjaŭlajecca ŭłasnaściu adździeła kultury rajvykankama, kažuć na pradpryjemstvie.

Što za abjekty Padkarytaŭ ličyć svaimi i čamu

Heta raźmieščany ŭ ruinach stajni šmatfunkcyjanalny paviljon sa składnikami i prynaležnaściami. Paviljon byŭ zrobleny kampanijaj «JUPK-Stroj» na asabistuju zamovu Padkarytava i pieradadzieny UP «Majontak Padarosk» na pravie haspadarčaha kiravańnia. Taki ž paviljon raźmieščany ŭ abjekcie «kuźnia».

Paviljony — časovyja zbudavańni, jakija płanavałasia raźmiaścić na terytoryi siadziby pavodle prajektu, zaćvierdžanaha Ministerstvam kultury. Ich mieli prystasavać pad abjekty prydarožnaha servisu: kafe i kramu. Jany sami nie źjaŭlajucca ni abjektami nieruchomaści, ni nieadździelnymi palapšeńniami tych abjektaŭ, jakija Padkarytaŭ nabyŭ u adździeła kultury ŭ 2013 hodzie.

Takim čynam, časovyja zbudavańni zastajucca ŭłasnaściu Padkarytava i znachodziacca ŭ haspadarčym kiravańni UP «Majontak Padarosk» dahetul.

Demantaž nie dazvolili

Padčas vykanańnia rašeńnia suda ab viartańni siadziby va ŭłasnaść adździeła kultury hetyja paviljony nie aryštavali i nie apisali. I ŭ vyniku nie pieradali adździełu kultury.

U 2024 i 2025 hadach UP «Majontak Padarosk» niekalki razoŭ prapanoŭvaŭ adździełu kultury vyrašyć los svajoj ułasnaści dahavornym sposabam. Ale adkazu pa sutnaści nie atrymaŭ. Adździeł kultury taksama zabaraniŭ demantaž, pahražajučy źviarnucca ŭ pravaachoŭnyja orhany pry jaho sprobie.

«Faktyčna ciapier adździeł kultury niezakonna sprabuje pradać čužuju majomaść, — kažuć na pradpryjemstvie. — Važna taksama papiaredzić patencyjnaha pakupnika ab tym, što jon mimavoli moža vystupić u jakaści saŭdzielnika ŭ parušeńni čužych pravoŭ ułasnaści».

Taksama jość inšyja «abciažarvalnyja abstaviny». Naprykład, u siadzibie niama krynicy vodazabieśpiačeńnia. Kanalizacyjny kalektar treba demantavać, a zatym pabudavać novy, zaćvierdžany novym prajektam.

U siadzibie niama krynicy ciepłazabieśpiačeńnia, hazapravod dla zabieśpiačeńnia siadziby ciapłom daviadziecca ciahnuć na značnuju adlehłaść, što źviazana ź vialikimi vydatkami.

— I, viadoma ž, zaŭsiody budzie ryzyka admieny rašeńnia suda 2023 hoda ab kanfiskacyi majomaści Padkarytava (usie dakumienty staranna zachoŭvajucca), adpaviedna, novy pakupnik moža być pryznany niadobrasumlennym i budzie abaviazany viarnuć majomaść zakonnamu ŭładalniku, — nahadvajuć aŭtary.

Kamientary da artykuła