Pravaabaroncy: KDB sprabavaŭ vykarystać śviatara Akałatoviča, kab zavabić u pastku nuncyja

Narviežskaja pravaabarončaja arhanizacyja Forum 18 paviedamiła pra sproby biełaruskaha KDB vykarystoŭvać katalickaha śviatara Hienrycha Akałatoviča, kab skampramietavać apostalskaha nuncyja Vatykana.

Hienrych Akałatovič

Pavodle źviestak pravaabaroncaŭ, u KDB nibyta prapanavali vyzvalić śviatara, kali jon paśla viartańnia da słužeńnia ŭ parafii ŭ Vałožynie padkinie nuncyju fłešku z materyjałami, jakija mahli b jaho skampramietavać. Akałatovič, adnak, admoviŭsia, zajaviŭšy, što heta złačynstva i što jon nie moža zdradžvać Bohu.

Jak paviedamlajuć byłyja palitźniavolenyja, KDB praciahvaŭ akazvać cisk na śviatara ŭ śledčym izalatary, pahražajučy viartańniem u turmu, kab prymusić jaho źmianić rašeńnie. Taksama ahientura KDB imkniecca vierbavać infarmataraŭ siarod relihijnych lidaraŭ i supolnaściaŭ jak u Biełarusi, tak i za jaje miežami, kab atrymlivać infarmacyju pra dziejnaść cerkvaŭ i asob, ź imi źviazanych.

Ksiondz Hienrych Akałatovič byŭ aryštavany ŭ listapadzie 2023 hoda, a ŭ śniežni 2024 hoda Minski abłasny sud asudziŭ jaho na 11 hadoŭ pazbaŭleńnia voli pa abvinavačańni ŭ dziaržaŭnaj zdradzie, abaviazaŭšy taksama vypłacić vialiki štraf. Paśla taho jaho źmiaścili ŭ kałoniju № 2 u Babrujsku, dzie praciahvalisia sproby KHB prymusić jaho da supracoŭnictva.

«Forum 18» adznačaje, što kantrol KDB nad relihijnymi supolnaściami ŭzmacniŭsia paśla žorstkaha padaŭleńnia pratestaŭ u 2020 hodzie i pryniaćcia novaha zakona ab relihii ŭ 2024 hodzie, a relihijnyja lidary bajacca raspaŭsiudžvać infarmacyju pra cisk, kab nie stracić aŭtarytet abo nie padvierhnucca represijam.

Kamientary da artykuła