«Maje prodki — niemcy, ale ŭ dušy ja ruski». Niemiec atrymaŭ šeść hadoŭ za špijanaž. I cikavaja paralel sa spravaj Kryhiera ŭ Biełarusi

Hramadzianin Hiermanii i Rasii Dyter S. byŭ abvinavačany ŭ špijanažy, padrychtoŭcy dyviersij na čyhuncy, a taksama ŭdziele ŭ «terarystyčnaj arhanizacyi», u składzie jakoj vajavaŭ na Danbasie. Zavierbavali jaho ŭ 2014 hodzie.

Dyter S. u zali suda. Skryn videa: tagesschau.de

Jak paviedamlaje Tagesschau.de, u Miunchienie zaviaršyŭsia praces suprać 42‑hadovaha Dytera S. i dvuch jaho pamahatych — Alaksandra J. i Aleksa D. Kali jany atrymali ŭmoŭnyja terminy adpaviedna na dvanaccać i šeść miesiacaŭ, to dla Dytera S. Fiederalnaja prakuratura prasiła vosiem hadoŭ i vosiem miesiacaŭ pazbaŭleńnia voli.

Mužčyny byli abvinavačanyja ŭ tym, što, dziejničajučy pa zadańni rasijskaj śpiecsłužby, rychtavali dyviersii na čyhunačnych linijach i špijonili za vajskovaj infrastrukturaj u Hiermanii z metaj ździajśnieńnia napadaŭ.

Akramia hetaha, sud paćvierdziŭ abvinavačańnie Dytera S. u siabroŭstvie ŭ terarystyčnaj arhanizacyi. Mužčyna ŭ 2014 hodzie dałučyŭsia da prarasijskich apałčencaŭ na ŭschodzie Ukrainy. Jon byŭ členam interbryhady «Piatnaška» — padraździaleńnia samaabvieščanaj «Danieckaj Narodnaj Respubliki», jakoje niamieckaj justycyjaj kvalifikujecca jak terarystyčnaje.

Padčas pracesu abaroncy Dytera S. stavili hetyja abvinavačvańni pad sumnieŭ. Jany śćviardžali, što fotazdymki Dytera S. u formie byli insceniroŭkaj. Advakaty dakazvali, što ich padabaronny — prosta «akcior i chvalko», jaki šmat vydumlaŭ dla pontu i «kab być pryvabnym dla žančyn».

Suviaź z HRU

Adnak niezadoŭha da abviaščeńnia prysudu stali viadomyja novyja detali, jakija paćviardžajuć, što Dyter S. aktyŭna šukaŭ kantakty z prarasijskimi padraździaleńniami jašče ŭ 2014 hodzie.

U rasparadžeńnie niamieckaha telekanała SWR trapili kopii čataŭ taho času. U ich abmieńvalisia paviedamleńniami ludzi, jakija, mierkavana, kiravali bajavymi dziejańniami bryhad z Maskvy i byli źviazanyja sa śpiecpadraździaleńniami HRU Minabarony Rasii. Ich zadačaj była viarboŭka bajcoŭ i pryznačeńnie ich u asobnyja bryhady. Taksama jany paviedamlali patencyjnym navabrancam pra «kalidory», praź jakija možna było trapić u zonu bajavych dziejańniaŭ.

15 listapada 2014 hoda niechta Ihar B. padzialiŭsia ŭ čacie tekstam paviedamleńnia, jakoje jon atrymaŭ. U im čałaviek z Hiermanii paviedamlaŭ, što, choć i nie maje bajavoha dośviedu, choča dapamahčy. U paviedamleńni havaryłasia: «Choć mianie i vyvieźli z radzimy, a maje prodki — niemcy, u dušy ja ruski i zaŭsiody im zastanusia».

Imia hetaha čałavieka — Dźmitryj S. Profil Dźmitryja S. u sacyjalnych sietkach, źviazany z hetymi čatami, utrymlivaŭ vidavočnyja spasyłki na Dytera S., u tym liku videa z aŭtamabilem z numarami niamieckaha horada Bajrojt — apošniaha miesca žycharstva abvinavačanaha.

Paviedamlajecca taksama, što Dyter S. abmiarkoŭvaŭ ź Iharam B. maršrut pajezdki, prapanujučy pryjechać na aŭtamabili. Płanavanaja data prybyćcia i miesca pryznačeńnia (Rastoŭskaja vobłaść) supadajuć z vynikami rasśledavańnia Fiederalnaj prakuratury.

Dyter S. Pryvatnaje fota / sueddeutsche.de

U vyniku mužčynu pryniali ŭ «Piatnašku», choć jon nie słužyŭ u vojsku i vajskovaha dośviedu naohuł nie mieŭ. U 2016 hodzie Dyter S. viarnuŭsia z Ukrainy ŭ Hiermaniju, a paśla poŭnamaštabnaha ŭvarvańnia Rasii va Ukrainu znoŭ vyjšaŭ na suviaź z rasijanami i staŭ rychtavać dyviersii ŭ Hiermanii.

Kankretnyja zadańni dla rasijskaj raźviedki

Jak paviedamlaje Süddeutsche Zeitung, Dyter S., znachodziačysia ŭ «ciažkim finansavym stanoviščy», prapanavaŭ kamandziru rasijskaj armii infarmacyju, važnuju dla vajskovaha viedamstva. U 2024 hodzie Dyter S., siarod inšaha, dasłaŭ videa vajskovych pieravozak kala Parśbierha kamandziru «Piatnaški» Achry Avidzbu, jakoha słužby biaśpieki źviazvajuć z rasijskaj vajskovaj raźviedkaj HRU.

Pa zadańni Avidzby abvinavačany taksama pravodziŭ raźviedku na vajskovym palihonie ZŠA ŭ Hrafienviory, a taksama na naftapierapracoŭčych zavodach u Bavaryi i na čyhunačnych puciach. Pa słovach sudździ, metaj usioj hetaj dziejnaści było «ažyćciaŭleńnie aktaŭ sabatažu suprać hetych abjektaŭ».

Dyter S. pry hetym sam prapanoŭvaŭ kankretnyja idei — vybuchi, padpały budynkaŭ, psavańnie čyhunak. U čatach z Avidzbam jon abmiarkoŭvaŭ, naprykład, jak zamacavać śpiecyjalnuju mietaličnuju tarmaznuju kałodku na čyhuncy, pa jakoj išła vajskovaja dapamoha va Ukrainu. Takaja pryłada moža nie tolki pieraškodzić ruchu ciahnikoŭ, ale i prymusić ich syści z rejek.

Pa słovach sudździ, metaj płanavanaha sabatažu było ŭ doŭhaterminovaj pierśpiektyvie adbićcio ŭ niemcaŭ žadańnia padtrymlivać Ukrainu.

Dyter S. byŭ zatrymany ŭ krasaviku 2024 hoda. Razhledzieŭšy abvinavačańnie Fiederalnaj prakuratury, Vyšejšy rehijanalny sud Miunchiena 30 kastryčnika 2025 hoda pryhavaryŭ Dytera S. da šaści hadoŭ pazbaŭleńnia voli.

Jak adznačaje Süddeutsche Zeitung, padobna, što ŭpieršyniu z časoŭ Chałodnaj vajny niamiecki sud vynies prysud za «ahienturnuju dziejnaść z metaj sabatažu» pa zadańni Rasii.

«Cikava supastavić prysudy Dyteru S. u Hiermanii i Ryka Kryhieru ŭ Biełarusi: S. nie tolki rychtavaŭ dyviersii, ale i paśpieŭ paŭdzielničać u bajavych dziejańniach. A «hora-sałdat» Kryhier i zusim da frontu va Ukrainie nie dabraŭsia. Adnaho čakaje turma ŭ Hiermanii, druhomu pahražaŭ rasstreł u Biełarusi», — tak u svaim telehram-kanale prakamientavaŭ hetuju špijonskuju spravu palitołah Alaksandr Frydman.

Kamientary da artykuła