Inicyjatyva MALDZIS vykupiła kartu Biełarusi Arkadzia Smoliča
Biełarusy vykupili ŭ pryvatnaha kalekcyjaniera ŭ Polščy pieršuju biełaruskamoŭnuju kartu krainy.
Usie fota: Alina Mazaviec
Inicyjatyva MALDZIS vykupiła kartu Biełarusi, stvoranuju Arkadziem Smoličam i nadrukavanuju ŭ Vilni ŭ 1919 hodzie, paviedamlaje telehram-kanał prajekta.
Heta pieršaja biełaruskamoŭnaja karta našaj krainy. Jaje aŭtaram ličycca adzin z baćkoŭ-zasnavalnikaŭ BNR i pieršy prafiesar hieahrafii ŭ BSSR Arkadź Smolič.
«Hetaja karta ŭnikalnaja tym, što na joj adlustravanaja ŭsia tahačasnaja terytoryja pražyvańnia biełarusaŭ. Pierad nami paŭstaje kraina, jakaja terytaryjalna pieraŭzychodzić bolšaść jeŭrapiejskich dziaržaŭ, choć pa fakcie jana takoj i nie paŭstała», — kaža Pavieł Macukievič, kiraŭnik inicyjatyvy MALDZIS.
Karta była nabytaja ŭ Polščy ŭ pryvatnaha kalekcyjaniera na srodki biełaruskich achviaradaŭcaŭ: Darji Śliž i Illi M.
U budučyni jana budzie pieradadzienaja ŭ Kličaŭski krajaznaŭčy muziej u jakaści hramadskaha padarunka, paviedamlaje telehram-kanał prajekta.
Akramia taho MALDZIS u supracy z vydaviectvam Gutenberg i studyjaj Imago.by padrychtavaŭ limitavanuju padarunkavuju kopiju karty Smoliča. Jaje možna nabyć na sajcie vydaviectva Gutenberg u ramcy albo z draŭlanym padviesam.
«Za savieckim časam mapa Smoliča była zabaronienaja, bo pakazvała Biełaruś jak niezaležnuju dziaržavu. Jana zachavałasia ŭ niekalkich asobnikach i nam paščaściła nabyć adzin ź ich. My radyja, što razam z partniorami dajem mahčymaść kožnamu čałavieku nabyć kopiju i takim čynam viarnuć mapu da žyćcia», — kaža Ryhor Astapienia, apiakun inicyjatyvy MALDZIS.