21‑hadovuju administratarku telehram-kanała akupavanaha Mielitopala asudzili ŭ Rasii na 14 hadoŭ
Paŭdniovy Akruhovy vajenny sud u Rastovie-na-Donie prysudziŭ da 14 hadoŭ kałonii 21‑hadovuju administratarku Mielitopalskaha telehram-kanała «Mielitopal cie Ukrajina» Janu Suvoravu pa abvinavačvańni ŭ špijanažy, ździajśnieńni teraktu i ŭdziele ŭ terarystyčnaj supołcy, pajedamlaje «Miedyjazona».
Administratary praŭkrainskich telehram-kanałaŭ pra akupavany rasiejskimi vojskami Mielitopal, siarod jakich była i Suvorava, byli zatrymanyja ŭ žniŭni 2023 hoda,
FSB paviedamiła pra zatrymańnie tolki ŭ kastryčniku. Byli zatrymanyja kala 10 čałaviek, adzin ź ich — Mark Kalijuš — 24 žniŭnia viarnuŭsia va Ukrainu pa abmienie.
Jon raspavioŭ pra katavańni. Astatnija aryštavanyja znachodziacca ŭ roznych turmach na terytoryi Rasii. U vieraśni adnaho z administrataraŭ kanała «Mielitopal» Uładzisłava Hieršona prysudzili da 15 hadoŭ pazbaŭleńnia voli, a administratara kanała «RIA-Mielitopal» Hieorhija Leŭčankua da 16 hadoŭ.
Rasiejskaje śledstva miarkuje, što na zadańnie ŭkrainskaj vajskovajra-viedki HUR administratary mielitopalskich kanałaŭ prasili padpisčykaŭ paviedamlać praz bot zvarotnaj suviazi pra navały rasiejskich vajskoŭcaŭ i techniki, a potym pieradavali infarmacyju ŭkrainskim vajskoŭcam.
Suvoravu i jaje kaleh abvinavacili, u pryvatnaści, u tym, što jany naviali HIMARS na budynak Mielitopalskaha kaledža, dzie raźmiaščalisia ŭpraŭleńni Rashvardyi i FSB. U sakaviku 2023 hoda ŭkrainskija vajskoŭcy ŭdaryli pa budynku kaledža. Pavodle źviestak «Miedyjazony», supracoŭniki siłavych struktur paśpieli evakujavacca i nichto nie paciarpieŭ.
Mielitopal byŭ adnym ź pieršych ukrainskich haradoŭ, jaki akupavała Rasija paśla ŭvarvańnia ŭ lutym 2022 hoda. Z tych časoŭ jon zastajecca pad kantrolem Rasii, tam pracujuć padkantrolnyja Rasii orhany ŭłady Zaparožskaj vobłaści.