Ukraina pakazała novy marski dron, jaki padarvaŭ Krymski most

Słužba biaśpieki Ukrainy prademanstravała marskija drony Sea Baby novaha pakaleńnia, jakija vykanali sakretnuju rolu ŭ padryvie Krymskaha mosta ŭ červieni hetaha hoda. Śćviardžajecca, što jany mohuć źmianić bałans sił na Čornym mory.

Novaje pakaleńnie Sea Baby z bajavym modulem «Taŭryja 14,5». Fota: SBU

Jak paviedamlaje Defense Express, na prezientacyi śpiecsłužby Ukrainy pakazali dva typy bieśpiłotnikaŭ Sea Baby novaha pakaleńnia. Miarkujecca, što abodva jany zdolnyja nieści bajavuju častku vahoj 900 kh, jakuju možna vykarystoŭvać jak dla kamikadze-ataki, tak i dla samaźniščeńnia drona ŭ vypadku niemahčymaści jaho viartańnia na bazu. Dron maje ŭražlivuju dalokaść chodu da 1500 km i moža pieravozić ahułam da 2 ton karysnaj nahruzki.

Pa słovach bryhadnaha hienierała SBU Ivana Łukaševiča, mienavita hetyja bieśpiłotniki ŭ abnoŭlenaj viersii vykanali sakretnuju rolu padčas adnoj ataki na Krymski most 3 červienia 2025 hoda, dastaviŭšy vybuchoŭku dla jaho paražeńnia.

Varyjant 1: «Marski źniščalnik»

Pieršy pradstaŭleny typ drona pryznačany dla źniščeńnia varožych marskich bieśpiłotnikaŭ. Hetaja ideja, pa słovach Łukaševiča, była inicyjavanaja kiraŭnikom SBU Vasilom Malukom jašče hod tamu.

Dla vykanańnia hetaj zadačy dron uzbrojeny stabilizavanym bajavym modulem «Taŭryja 14,5» z kulamiotam kalibru 14,5 mm (KPVT). Jaho standartny bojekamplekt składaje 200 strełaŭ. Optyka modula dazvalaje vyjaŭlać celi na adlehłaści da 5 km dniom i ŭnačy, a sam kulamiot zdolny efiektyŭna paražać cel typu «marski dron» na dystancyi bolš za 1 kiłamietr.

Za bajavym modulem raźmieščany dva kantejniery, vizualna padobnyja da tych, što vykarystoŭvajucca dla zapusku FPV-dronaŭ, jakija mohuć słužyć dadatkovym srodkam paražeńnia.

Akramia ŭzbrajeńnia, na korpusie raźmieščany kamiery, anteny suviazi i, vierahodna, nievialikaja sudnavaja RŁS abo terminał spadarožnikavaj suviazi.

Varyjant 2: Nośbit reaktyŭnych snaradaŭ

Što tyčycca druhoha typu pradstaŭlenaha Sea Baby novaha pakaleńnia, to tut usio krychu cikaviej. Hetaja madyfikacyja abstalavana 10‑zaradnaj 122‑mm reaktyŭnaj sistemaj załpavaha ahniu (RSZA) «Hrad», što pieratvaraje Sea baby u mabilnuju marskuju artyleryju. Śpiecyjalny miechanizm dazvalaje padymać i apuskać puskavuju ŭstanoŭku dla naviadzieńnia.

Adnak ekśpierty miarkujuć, što hetaje ŭzbrajeńnie, chutčej za ŭsio, pryznačana dla viadzieńnia ahniu pramoj navodkaj u miežach bačnaści. Uličvajučy nizkuju dakładnaść samoj sistemy «Hrad», stralba pa naviasnoj trajektoryi z takoj niestabilnaj płatformy, jak marski dron, była b praktyčna nieefiektyŭnaj.

Varta adznačyć, što heta nie pieršaja sproba ŭstalavać nakiravalnyja ad «Hrada» na Sea Baby — padobnyja ekśpierymienty pravodzilisia i raniej, ale ŭ novaj viersii hetaja ideja była technična dapracavana.

Na pieršym płanie — Sea Baby z bajavym modulem «Taŭryja 14,5», a za joj — viersija z 10‑ci zaradnaj RSZA «Hrad». Fota: SBU

Hałoŭnaje novaŭviadzieńnie — modulnaść

Jak adznačajuć ekśpierty, klučavoj asablivaściu novaha pakaleńnia Sea Baby źjaŭlajecca ich modulnaja kanstrukcyja. Abodva pakazanyja varyjanty vykarystoŭvajuć adnolkavy korpus praktyčna biez dapracovak. Usio ŭzbrajeńnie i dadatkovaje abstalavańnie raźmiaščajucca na śpiecyjalnym karkasie, jaki macujecca da korpusa drona šrubami.

Heta aznačaje, što novy Sea Baby źjaŭlajecca ŭniviersalnaj bazaj, na jakuju ŭ zaležnaści ad misii možna chutka ŭstalavać nieabchodny modul z uzbrajeńniem — kulamiotny, rakietny ci inšy. Heta značna paskaraje i zrabiła tańniejšym praces padrychtoŭki drona da zadačy i intehracyi novych vidaŭ zbroi, u adroźnieńnie ad raniejšych viersij, dzie ŭzbrajeńnie manciravałasia niepasredna na korpus, što patrabavała źmienaŭ u kanstrukcyi.

Jak piša vydańnie B-TECH, stratehičnaje značeńnie Sea Baby ciažka pieraacanić. U rehijonie Čornaha mora, dzie tradycyjnyja fłaty i bazy majuć svaje abmiežavańni, źjaŭleńnie tannych, mabilnych, aŭtanomnych udarnych płatform źmianiaje bałans sił. Praciŭniku davodzicca abo ŭzmacniać abaronu, abo pierahladać taktyku, a Ukraina atrymlivaje novuju zbroju z doŭhaterminovym efiektam. Bolš za toje, kamiercyjalizacyja i kraŭdfandynh takich prajektaŭ stvarajuć precedent: hramadzianski ŭdzieł u abaronie stanovicca častkaj stratehii.

Kamientary da artykuła