Viarchoŭny sud Łatvii pryznaŭ nieabhruntavanym pazbaŭleńnie DNŽ biełarusa, byłoha milicyjanta
Byłoha supracoŭnika MUS Biełarusi, jaki doŭhi čas pražyvaje ŭ Łatvii, jaho žonka —— hramadzianka Łatvii, jany razam vychoŭvajuć dvuch niepaŭnaletnich dziaciej, jakija taksama źjaŭlajucca hramadzianami Łatvii, mielisia pryznać pahrozaj nacyjanalnaj biaśpiecy.
Viarchoŭny sud Łatvii. Fota: at.gov.lv
Departamient pa administracyjnych spravach Sienata Viarchoŭnaha suda Łatvii pakinuŭ u sile rašeńnie, jakoje admianiła anulavańnie časovaha dazvołu na žycharstva hramadzianina Biełarusi. Sud pryznaŭ rašeńnie ab pazbaŭleńni DNŽ niepraparcyjnym, piša Reform.
Raniej Upraŭleńnie pa spravach hramadzianstva i mihracyi anulavała DNŽ zajaŭnika, jaki ŭ minułym byŭ supracoŭnikam unutranych orhanaŭ Biełarusi. Heta było zroblena na padstavie zaklučeńnia Słužby dziaržaŭnaj biaśpieki Łatvii ab tym, što biełarus moža ŭjaŭlać pahrozu nacyjanalnaj biaśpiecy.
Hramadzianin Biełarusi asprečyŭ anulavańnie ŭ sudzie, spasyłajučysia na parušeńnie pryncypu suraźmiernaści. Jon pakazaŭ, što doŭhi čas žyvie ŭ Łatvii, stvaryŭ siamju z hramadziankaj Łatvii i vychoŭvaje dvuch niepaŭnaletnich dziaciej, jakija taksama źjaŭlajucca hramadzianami krainy. Jahony isk byŭ zadavoleny ŭžo ŭ pieršaj i apielacyjnaj instancyjach.
Viarchoŭny sud pahadziŭsia z akruhovym sudom, što rašeńnie było niepraparcyjnym.
Niahledziačy na toje, što Zakon ab imihracyi praduhledžvaje abaviazkovaje anulavańnie DNŽ u takich vypadkach, Sienat padkreśliŭ, što važna aceńvać suraźmiernaść administracyjnych aktaŭ, kali jany zakranajuć asnoŭnyja pravy čałavieka.
Sud pryjšoŭ da vysnovy, što hramadskaja karyść ad uviedzienaha abmiežavańnia nie pieravažvaje škodu, pryčynienuju pryvatnamu i siamiejnamu žyćciu biełarusa anulavańniem DNŽ.