U ispanskim horadzie na miesiac zabaranili brać sabie z prytułkaŭ čornych katoŭ

U ispanskim horadzie Terasa, što na paŭnočnym uschodzie Katałonii, časova zabaranili addavać čornych katoŭ z prytułkaŭ, kab praduchilić mahčymyja «rytuały» padčas śviatkavańnia Chełoŭina, paviedamlaje Bi-bi-si.

Zdymak ilustracyjny. Fota: freepik.com

Miascovaja słužba abarony žyvioł paviedamiła, što ŭsie zajaŭki na prymańnie ŭ siamju abo časovuju apieku nad čornymi katami buduć adchilenyja z 6 kastryčnika da 10 listapada, kab abaranić žyvioł ad mahčymych traŭmaŭ ci vykarystańnia ŭ dekaracyjach.

Namieśnik mera horada Nael Dukie paviedamiŭ telekanału RTVE, što kolkaść zapytaŭ na zabirańnie z prytułkaŭ čornych katoŭ zvyčajna pavialičvajecca napiaredadni Chełoŭina.

Choć u zachodniaj kultury čornyja katy časta asacyjujucca z čaraŭnictvam i niaščaściem, u mnohich inšych kulturach — naprykład, u Japonii i Jehipcie — jany ličacca simvałami dastatku i ŭdačy.

Haradskaja rada Terasy adznačyła, što vypadkaŭ žorstkaha abychodžańnia z čornymi katami mienavita ŭ ich horadzie nie zafiksavana, adnak padobnyja incydenty adbyvalisia ŭ inšych rehijonach. Tamu rašeńnie było pryniata paśla papiaredžańniaŭ ad arhanizacyj, jakija zajmajucca abaronaj žyvioł.

«My starajemsia praduchilić situacyi, kali ludzi biaruć žyvioł impulsiŭna abo tamu, što heta modna. A ŭ takich vypadkach, pra jakija my viedajem, taksama sprabujem nie dapuścić jakich-niebudź zmročnych praktyk», — skazaŭ Dukie.

Pa danych miascovych uładaŭ, u Terasie žyvie bolš za 9 800 katoŭ. U haradskim prytułku znachodzicca kala 100 žyvioł, ź jakich 12 — čornyja, paviedamiła Katałonskaje infarmacyjnaje ahienctva.

Haradskaja rada padkreśliła, što zabarona «časovaja i vyklučnaja», jana źjaŭlajecca dadatkovaj mieraj dla abarony žyvioł. Nie vyklučana, adnak, i mahčymaść paŭtareńnia takoj inicyjatyvy ŭ budučyni.

Padčas dziejańnia zabarony vyklučeńni buduć razhladacca indyvidualna, a zvyčajny praces zabirańnia žyvioł z prytułku dachaty adnovicca paśla Chełoŭina.

Kamientary da artykuła