Biełaruski fiermier pakazaŭ, jak źbiraje ŭradžaj. Narod u zachapleńni — videa źbirajuć miljony prahladaŭ
Pad niekatorymi videa šmat kamientaroŭ na anhlijskaj.
Skrynšoty: nikolay_tarasevich / TikTok
Małady fiermier z Bresckaj vobłaści Mikałaj Tarasievič pakazvaje ŭ tyktoku svaju pracu. Videa, jak jon z dapamohaj kambajna źbiraje ŭradžaj morkvy, nabrała bolš za 42 miljony prahladaŭ i bolš za 13 tysiač kamientaroŭ. Admietna, što samyja papularnyja — na anhlijskaj movie.
Na videa bačna, jak kambajn akuratna vydziraje morkvu ź ziamli, abbivaje reštki hruntu, abrublivaje zialony markoŭnik i paśla vykidaje ŭradžaj na ziamlu. Praca techniki zavarožvaje.
Mnohija ŭ kamientarach pytalisia, čamu morkva paśla zboru zastajecca na ziamli.
«Heta było sapraŭdy efiektyŭna, pakul jany prosta nie kinuli jaje na ziamlu», — napisała karystalnica tyktoku.
«A čaho na ziamlu? Čamu nie ŭ kuzaŭ?» — spytaŭ jašče adzin kamientatar.
Inšyja patłumačyli im, što morkvie treba prasochnuć, a paśla jaje źbiare inšaja technika.
Siarod mnohich ruskamoŭnych kamientataraŭ hety rolik vyklikaŭ uspaminy, jak jany ŭ studenckija časy jeździli źbirać uradžaj u palach. Adnyja z radaściu zhadvajuć takija pryhody, a inšyja nazyvajuć žacham.
U inšym papularnym roliku fiermier pakazvaje, jak kambajn źbiraje buraki. Videa nabrała 3,2 miljona prahladaŭ.
U kamientarach mnohija nachvalvajuć techniku, jakaja tak chutka i aściarožna źbiraje ŭradžaj burakoŭ.
«Kaliści my hiektary rvali rukami na palach, dapamahali baćkam. Ciapier heta ŭsio nakolki sproščana», — pišuć.
«Małajcy, kanstruktary, dobruju mašynu stvaryli. Usio idzie jak pa maśle», — chvalać.
Što heta za technika i kolki moža kaštavać?
Mnohija hadajuć, čyjoj vytvorčaści cuda-technika, na jakoj pracuje fiermier. Častka kamientataraŭ miarkuje, što heta «Homsielmaš», a inšyja, što heta kitajskija kambajny.
Na spravie heta technika niderłandskaj firmy Keulmac, firmovy šyldzik možna razhladzieć na videa sa zboram buraka. Vyznačyć madel składana, ale kaštuje jana adnaznačna nie tanna.
Skrynšot: traktorpool.nl
Tak, kambajn, vielmi padobny da taho, na jakim pracuje biełarus, pradajecca ŭ Niderłandach za 42 500 jeŭra. I heta za techniku 2004 hoda vypusku.