U Jehipcie padpisali pahadnieńnie ab spynieńni ahniu ŭ Hazie

Złučanyja Štaty Amieryki razam ź Jehiptam, Kataram i Turcyjaj padpisali pahadnieńnie ab spynieńni ahniu ŭ siektary Haza. Cyrymonija prajšła 13 kastryčnika 2025 hoda ŭ Šarm-el-Šejchu, dzie prachodzić mižnarodny samit, pryśviečany budučyni paleścinskaha ankłava.

Donald Tramp pakazvaje padpisanaje pahadnieńnie. Fota: Chip Somodevilla/Getty Images

Pahadnieńnie padpisali prezident ZŠA Donald Tramp, prezident Jehipta Abdel Fatach as-Sisi, emir Katara Tamim bin Chamad Al Tani i prezident Turcyi Redžep Taip Erdahan — usie jany vystupili jak pasiaredniki ŭ mirnych pieramovach. Padrabiaznaści dakumienta pakul nie raskryvajucca.

Padčas svajho vystupu na samicie prezident Jehipta adznačyŭ, što hetaja damova «pierahortvaje balučuju staronku historyi» i adkryvaje šlach da adnaŭleńnia Hazy. Jon padziakavaŭ Trampu za inicyjatyvu i padkreśliŭ, što «mir nie budzie poŭnym biez adnaŭleńnia razburanych terytoryj».

Tramp, u svaju čarhu, zajaviŭ, što «nichto nie vieryŭ, što heta mahčyma», i nazvaŭ padpisańnie pahadnieńnia «novym i pryhožym dniom». Jon paviedamiŭ, što ŭ Hazu ŭžo pastupaje humanitarnaja dapamoha — sotni hruzavikoŭ ź ježaj, miedykamientami i nieabchodnymi rečami, častku jakich finansujuć krainy — udzielnicy samitu. Pavodle jaho słoŭ, mirnyja žychary viartajucca ŭ svaje damy, a zakładniki ŭźjadnoŭvajucca ź siemjami.

Na samit u Šarm-el-Šejchu byli zaprošanyja pradstaŭniki 27 dziaržaŭ — siarod ich prezident Francyi, kancler Hiermanii, premjery Vialikabrytanii, Italii, Ispanii, Kanady, a taksama kiraŭniki Iardanii, Katara i Bachrejna. Adnak pradstaŭniki Izraila i ruchu CHAMAS na samicie nie prysutničajuć, a Iran admoviŭsia ad udziełu.

Zustreča adbyvajecca paśla taho, jak CHAMAS vyzvaliŭ usich 20 žyvych izrailskich zakładnikaŭ.

Kamientary da artykuła