Dojlidu z Brestčyny, jaki budavaŭ cerkvy ŭ niekalkich krainach, dali kałoniju pa čatyroch palityčnych artykułach

Dojlid Aleh Kinieŭ śpiecyjalizujecca na budaŭnictvie z dreva — najpierš kultavych pabudoŭ.

Aleh Kinieŭ. Fota: 1pr.live

Alehu Kinievu 56 hadoŭ. Jon žyvie ŭ ahraradku Pieršamajskaja (Błudzień) u Biarozaŭskim rajonie Bresckaj vobłaści. Prachodziŭ terminovuju słužbu ŭ marskoj piachocie.

Jon pradprymalnik, zajmajecca dachavymi pracami. Jahonaja śpiecyjalizacyja — vyrab kupałaŭ dla pravasłaŭnych cerkvaŭ. Aleh zajmajecca hetym z 2000-ch. Spačatku jon pracavaŭ z bryhadaj jak najomny pracaŭnik, a praź niekalki hadoŭ adkryŭ svaju spravu.

Kupał u vioscy Ivaničy Červieńskaha rajona Minskaj vobłaści. Fota: 1pr.live

Kinieŭ rekanstrujavaŭ kupał Patryjaršaha pradstaŭnictva RPC, stvaraŭ kupał dla carkvy vajskovaj čaści ŭ Słonimie, rabiŭ dubovy most, prystań i altanku na vyspačcy pobač ź siadzibaj hrafa Huten-Čapskaha ŭ Stańkavie i časoŭniu ŭ zaaparku. Ahułam ža jahonyja pracy raskidanyja pa roznych haradach i vioskach Biełarusi.

Kupały vytvorčaści Aleha jość i ŭ Litvie, Šviecyi i ZŠA.

Kupały dla manastyra ŭ Virdžynii (ZŠA), jakija stvaraŭ Aleh Kinieŭ

Aleha Kinieva aryštavali naprykancy 2024 hoda. Niadaŭna jaho asudzili pa čatyroch artykułach — «raspalvańnie varožaści» (č. 1 art. 130 KK), «abraza Łukašenki» (č. 1 art. 368 KK), «abraza słužbovaj asoby» (art. 369 KK) i «ŭstupleńnie ŭ skład ekstremisckaha farmiravańnia» (č. 3 art. 361‑1 KK).

Dojlidu pahražała da šaści hadoŭ kałonii, ale dakładny prysud, jak i sutnaść abvinavačańniaŭ, nieviadomyja. Ciapier jon zastajecca za kratami.

Kamientary da artykuła