Tramp pryhraziŭ CHAMASu piekłam, kali jon nie zdasca da viečara niadzieli

Prezident ZŠA Donald Tramp u piatnicu vystupiŭ z ultymatumam da paleścinskaj hrupoŭki CHAMAS: jana pavinna pryniać jahony mirny płan pa Hazie da 18:00 niadzieli pa vašynhtonskim časie (01:00 paniadziełka pa minskim).

Donald Tramp. Fota: Andrew Harnik / Getty Images

Kali hetaha nie adbudziecca, Tramp zajaviŭ, što suprać CHAMAS «razrazicca takoje piekła, jakoha jašče nichto nie bačyŭ». Pavodle jaho, mir na Blizkim Uschodzie budzie dasiahnuty «tak ci inakš».

«Pahadnieńnie z CHAMAS pavinna być dasiahnutaje da šaści hadzin viečara niadzieli pavodle vašynhtonskaha času, — napisaŭ Tramp u sacyjalnaj sietcy Truth Social. — Usie krainy padpisali pahadnieńnie! Kali heta pahadnieńnie apošniaha šancu nie budzie dasiahnuta, suprać CHAMAS razrazicca takoje piekła, jakoha jašče nichto nie bačyŭ. Mir na Blizkim Uschodzie budzie dasiahnuty tak ci inakš».

Hety płan, jaki składajecca z 20 punktaŭ, byŭ pradstaŭleny razam z premjer-ministram Izraila Bińjaminam Nietańjachu. Jon užo atrymaŭ padtrymku Izraila i šyrokaje mižnarodnaje ŭchvaleńnie. Asnoŭnyja jaho ŭmovy:

• CHAMAS pavinien vyzvalić usich 48 zakładnikaŭ, jakija jašče zastajucca ŭ pałonie (ź jakich kala 20, pavodle źviestak, jašče žyvyja);
• Bajeviki pavinny zdać zbroju i admovicca ad ułady ŭ Hazie;
• Izrail u adkaz spyniaje nastupalnyja dziejańni, vyvodzić vojski z bolšaj častki siektara, vyzvalaje sotni paleścinskich źniavolenych i zabiaśpiečvaje dostup humanitarnaj dapamohi;
• Terytoryja Hazy pierachodzić pad mižnarodnaje kiravańnie, jakoje buduć kantralavać Tramp i były premjer Vialikabrytanii Toni Błer;
• Raniejšyja płany pa prymusovym pierasialeńni paleścincaŭ u inšyja krainy adkładajucca.

U toj ža čas płan nie praduhledžvaje dalejšaha abjadnańnia Hazy z Zachodnim bieraham u miežach mahčymaj budučaj paleścinskaj dziaržavy.

Pradstaŭniki CHAMAS raniej adznačali, što niekatoryja punkty dakumienta jany ličać nieprymalnymi i patrabujuć pieramoŭ, ale nie ŭdakładnili, pra jakija mienavita havorka. Hrupoŭka praciahvaje nastojvać, što hatovaja vyzvalić zakładnikaŭ tolki ŭ abmien na poŭny vyvad izrailskich vojskaŭ i praciahłaje spynieńnie ahniu. Bińjamin Nietańjachu, adnak, ćviorda adchiliŭ hetyja ŭmovy, zajaviŭšy, što CHAMAS pavinien biezumoŭna zdacca i razzbroicca.

Situacyja zastajecca napružanaj: choć značnaja častka kiraŭnictva CHAMAS u Hazie ŭžo źniščanaja, hrupoŭka praciahvaje kantralavać asobnyja terytoryi i ździajśniaje pieryjadyčnyja ataki suprać izrailskich vojskaŭ.

Tramp śpiašajecca zaviaršyć kanflikt i damahčysia vyzvaleńnia zakładnikaŭ da druhoj hadaviny maštabnaha napadu CHAMAS na Izrail, jakaja prypadaje na hety aŭtorak.

Kamientary da artykuła