U ZŠA 18‑hadovy zumier zarabiŭ $30 miljonaŭ na dadatku, jaki ličyć kałoryi pa fota ježy

Za hod mabilny dadatak Cal AI, stvorany dla vyrašeńnia ŭłasnaj prablemy, vyras da maštabaŭ kampanii z hadavym dachodam $30 miljonaŭ i 30 supracoŭnikami ŭ štacie.

Zak Jadehary. Fota: zachyadegari / Instagram

Jak piša Fortune, šlach da pośpiechu pačaŭsia z asabistaj mety Zaka Jadehary. «Ja ŭsio žyćcio byŭ vielmi, vielmi chudy i chacieŭ pačać nabirać vahu», — raspaviadaje jon vydańniu.

Kali chłopiec zrazumieŭ, što asnoŭny prahres zaležyć ad dyjety, jon pačaŭ adsočvać kałoryi. Adnak vykarystańnie papularnych na toj čas dadatkaŭ było, pa jaho słovach, žudasnym dośviedam. Kožny pradukt davodziłasia ŭvodzić uručnuju, što vielmi napružvała.

Jon nie moh jeści ŭ školnaj stałovaj ź siabrami, bo charčavaŭsia zahadzia ŭzvažanymi porcyjami, i časta prapuskaŭ pachody ŭ kaviarni, bo nie viedaŭ kałaryjnaści straŭ.

Natchniony raźvićciom štučnaha intelektu i majučy navyki prahramavańnia, Zak vyrašyŭ stvaryć ułasny dadatak.

Zapusk i imklivy rost

Jadehary padzialiŭsia idejaj sa svaim siabram Hienry Łanhmakam, ź jakim paznajomiŭsia ŭ letnim łahiery, dzie vučyli prahramavańniu, i dvuma inšymi znajomymi z tvitara — 24‑hadovym Błejkam Andersanam i 30‑hadovym Džejkam Kaściła. Razam jany vyrašyli stvaryć madel ŠI, jakaja mahła b analizavać fota ježy i rabić usiu pracu za karystalnika.

Kamanda vydatkavała $2000 na testavy markietynh u sacyjalnych sietkach. Vodhuki byli nastolki stanoŭčymi, što jany vyrašyli praciahvać.

«My pačali zdymać tyktok-roliki, supracoŭničać ź influjensierami, i ŭ nas pačaŭsia vybuchovy rost», — kaža Jadehary.

Za pieršy miesiac dadatak prynios bolš za $28 000 dachodu, a za druhi — užo $115 000. 

Taki imklivy rost nie byŭ vypadkovaściu. Pa słovach Jadehary, jon pracavaŭ nad dadatkam pa 40 hadzin na tydzień — pisaŭ kod, abmiarkoŭvaŭ novyja funkcyi z dyzajnierami i raspracoŭščykami — i adnačasova paśpiavaŭ vučycca ŭ starejšaj škole. Pry hetym jon padtrymlivaŭ vydatnuju paśpiachovaść, majučy maksimalny siaredni bał 4.0.

U lipieni 2024 hoda suzasnavalniki ŭžo pravodzili sumoŭi ŭ San-Francyska z patencyjnymi pieršymi 15 supracoŭnikami.

Jak pracuje Cal AI 

Karystalniki Cal AI prosta zahružajuć fota svajoj ježy, i prahrama na asnovie štučnaha intelektu daje acenku ahulnaj kolkaści kałoryj. Pa słovach Jadehary, dakładnaść składaje 90%.

Dadatak možna spampavać biaspłatna ŭ Apple App Store i Google Play. Padpiska kaštuje $2,49 na miesiac abo $29,99 na hod. Za hod i čatyry miesiacy vałavy dachod ad Cal AI skłaŭ $30 miljonaŭ. U kampanii pracuje bolš za 30 čałaviek, a kolkaść zahruzak pieravysiła 8,3 miljona.

Dadatak Cal AI. Krynica: play.google

Adnak u dadatku jość i svaje niedachopy. U vodhukach karystalniki skardziacca na niedakładnaści. U intervju vydańniu CNBC Jadehary tłumačyć, što niekatoryja čakajuć ad ŠI niemahčymaha:

«Jany dumajuć, što ŭ jaho jość renthienaŭski zrok, i kali sfatahrafavać misku, jon ubačyć ježu, schavanuju na dnie. Ale heta nie tak».

Vunderkind, jaki pačaŭ prahramavać u 7 hadoŭ

Nieabchodna zaŭvažyć, što chłopiec nie pačatkoviec u śviecie technałohij. Natchniony luboŭju da Minecraft, jon pačaŭ vyvučać prahramavańnie ŭ letnim łahiery va ŭzroście 7 hadoŭ. U 10 hadoŭ jon užo davaŭ uroki pa prahramavańni za $30 za hadzinu, a ŭ 12 — raźmiaściŭ svoj pieršy dadatak Speed Soccer u App Store.

U starejšaj škole Jadehary stvaryŭ hulniavy sajt Totally Science, jaki dazvalaŭ vučniam hulać u anłajn-hulni ŭ abychod školnych błakirovak. Za dva hady sajt nabraŭ 5 miljonaŭ karystalnikaŭ i pačaŭ prynosić $60 000 na miesiac ad rekłamy. U 16 hadoŭ Zak pradaŭ jaho za $100 000 i pačaŭ stvarać mabilnyja dadatki.

Niahledziačy na vysoki siaredni bał i pośpiechi ŭ biźniesie, Jadehary nie pryniali ŭ prestyžnyja ŭniviersitety Lihi plušču. Ciapier jon vučycca va Univiersitecie Majami, ale, pa jaho słovach, nie płanuje zastavacca tam bolš za hod. Spačatku jon pastupiŭ u biznes-škołu, ale potym pieravioŭsia na fiłasofiju.

Fota: zachyadegari / Instagram

U sacyjalnych sietkach Jadehary demanstruje raskošny ład žyćcia hienieralnaha dyrektara startapa: viečarynki «amal kožnuju noč» u asabniaku, jaki jon zdymaje ź siabrami, i pajezdki na zaniatki na Lamborghini z numarnym znakam «CAL AI».

U Majami jon žyvie z hrupaj adnadumcaŭ — maładych i paśpiachovych pradprymalnikaŭ. Razam jany stvarajuć supolnaść App Mafia, dzie navučajuć inšych stvarać dadatki.

Płany na budučyniu

Jadehary płanuje kiravać Cal AI jašče dva hady, a potym pradać kampaniju abo pieradać kiravańnie inšamu CEO, kab pačać novy prajekt. Jon choča, kab jaho nastupnaje pačynańnie, taksama źviazanaje sa štučnym intelektam, sfarmavała budučyniu i stała častkaj jaho spadčyny.

«Ja dumaju, što pradprymalnictva — heta kruta, tamu što ŭ kančatkovym vyniku ŭzrost nie maje vialikaha značeńnia, — kaža jon. — Ty albo dobry ŭ tym, što robiš, albo nie, a rynak užo vyrašyć, jakimi buduć vyniki».

Kamientary da artykuła