Schovišča dla radyjeaktyŭnych adkidaŭ pabudujuć da 2030 hoda
U Biełarusi płanujuć stvaryć sučasnaje schovišča i kompleks pierapracoŭki radyjoaktyŭnych adkidaŭ. Abjekt budzie raźličany jak minimum na 500 hadoŭ i stanie asnoŭnym elemientam nacyjanalnaj sistemy biaśpiečnaha abychodžańnia z takimi adkidami. Jon budzie pracavać nie tolki dla patreb BiełAES, ale i dla ŭsioj krainy, uklučajučy miedycynskija adkidy i tak zvanuju «čarnobylskuju spadčynu». Pra heta havaryli na palach foruma World Atomic Week u Maskvie, paviedamlaje Tochka.by.
Zdymak ilustracyjny. Fota: LookByMedia
Budoŭla pavinna być zavieršanaja da 2030 hoda. Hałoŭnaja ideja — nie prosta izalacyja niebiaśpiečnych materyjałaŭ, a ich kompleksnaja pierapracoŭka. Heta dazvolić stvaryć u Biełarusi novuju halinu, padrychtavać śpiecyjalistaŭ i pavysić biaśpieku ŭsiaho jadziernaha siektara.
Miesca pad budoŭlu pakul nie vyznačana. Razhladajucca niekalki varyjantaŭ: kala Astravieckaj AES, u Mahiloŭskaj vobłaści, a taksama ŭ Homielskaj — u zonie, paciarpiełaj ad avaryi na ČAES, u tym liku ŭ Paleskim radyjacyjna-ekałahičnym zapaviedniku. Kančatkovaje rašeńnie prymuć paśla detalnych hieałahičnych i ekałahičnych daśledavańniaŭ.
Pavodle słoŭ śpiecyjalistaŭ, schovišča budzie abstalavana šmatuzroŭnievymi achoŭnymi barjerami, što dazvolić harantavać jaho biaśpieku na praciahu 500—600 hadoŭ. Na pačatkovym etapie tut buduć zachoŭvacca nizka– i siarednieaktyŭnyja adchody. Pytańni vysokaaktyŭnych adchodaŭ i adpracavanaha jadziernaha paliva vyrašajucca na miždziaržaŭnym uzroŭni ŭ supracoŭnictvie z Rasijaj.
Uviadzieńnie pieršaj čarhi kompleksu zapłanavana na 2030 hod, ale poŭnaje raźvićcio prahramy raściahniecca da 2050-ch. Užo ŭ 2026—2027 hadach pavinna adbycca dziaržaŭnaja ekałahičnaja ekśpiertyza vybranaj placoŭki.
Čytajcie taksama:
Nazvanyja try placoŭki pa mahčymym zachoŭvańni radyjeaktyŭnych adkidaŭ