Turcyja nakiravała samalot-radyjołakacyjny kompleks u Litvu na fonie parušeńniaŭ pavietranaj prastory z boku Rasii
Turcyja časova pierakinuła ŭ Litvu samalot sistemy rańniaha vyjaŭleńnia i kiravańnia (AWACS), zdolny vyjaŭlać nizkalotnyja bieśpiłotniki i inšyja abjekty, jakija časta nie fiksujucca naziemnymi radarami.
Ilustracyjny zdymak. Fota: ac.nato.int
Misija pačałasia ŭ paniadziełak i praciahniecca da čaćviarha. U Ministerstvie abarony Turcyi situacyju pakul nie kamientujuć, piša Bloomberg.
Heta rašeńnie razhladajecca jak žest salidarnaści ŭ miežach NATA, jaki adlustroŭvaje rost zakłapočanaści sajuźnikaŭ u suviazi z pavieličeńniem parušeńniaŭ pavietranaj prastory krain Bałtyi i Uschodniaj Jeŭropy z boku rasijskich samalotaŭ i bieśpiłotnikaŭ.
Vajennyja analityki ličać takija ŭvarvańni demanstratyŭnym ihnaravańniem miežaŭ Aljansu i, u vypadku ź Litvoj, Łatvijaj i Estonijaj, sihnałam, što Maskva nie ŭsprymaje ich jak samastojnyja dziaržavy.
Paśla incydentu ŭ Estonii, kali try rasijskija źniščalniki praviali ŭ pavietranaj prastory krainy 12 chvilin, Talin zaklikaŭ sklikać ekstrannyja pasiadžeńni NATA i Rady Biaśpieki AAN. Raniej paviedamlałasia i pra ŭvarvańni rasijskich bieśpiłotnikaŭ u Polšču i Rumyniju, a taksama ŭ Litvu z boku Biełarusi.
U adkaz na pahrozy Italija abviaściła ab padaŭžeńni terminu znachodžańnia svajoj sistemy supraćpavietranaj abarony ŭ Estonii. Polšča i Šviecyja rychtujuć sumiesnyja vučeńni.
Parušeńni pavietranaj prastory z boku Rasii stali asabliva častymi paśla pačatku jaje poŭnamaštabnaj ahresii suprać Ukrainy ŭ 2022 hodzie.