U rasijski pałon trapiŭ biełarus, jaki ŭ 2022 hodzie pieššu ŭciakaŭ z Ukrainy ad vajny
Ukrainski žurnalist Dźmitro Chiluk, vyzvaleny sioleta ŭ žniŭni z rasijskaha pałonu, raskazaŭ, što rasijanie pierad adychodam z Kijeŭskaj vobłaści ŭ 2022 hodzie zachapili ŭ pałon hramadzianina Biełarusi, jaki išoŭ pa darozie ŭ biełaruskim kirunku, spadziejučysia, što jamu dazvolać viarnucca dadomu, piša Radyjo Svaboda.
SIZA ŭ Navazybkavie. Fota: mipl.org.ua
«Jaho zatrymali ŭ Kijeŭskaj vobłaści. Jon byŭ va Ukrainie, kali adbyŭsia napad Rasii, i tady pieššu pajšoŭ u bok Biełarusi, uciakaŭ dadomu, spadziavaŭsia, što jaho prapuściać, bo jon inšaziemiec i mieŭ biełaruski pašpart. Ja viedaŭ jaho imia, ale ciapier nie ŭzhadaju, šmat času prajšło. Jaho mohuć pamiatać tyja chłopcy, jakija, na žal, pakul zastajucca ŭ rasijskim pałonie, jakich ź im zatrymali i jakija byli ź im u Navazybkavie ŭ kamiery. Jaho taksama aformili jak vajennapałonnaha», — skazaŭ Svabodzie Dźmitro Chiluk.
Pavodle jaho, biełarusa razam z ukrainskimi cyvilnymi zakładnikami pryvieźli ŭ turmu ŭ Navazybkaŭ Branskaj vobłaści. Jaho, jak i ŭsich cyvilnych ukraincaŭ, zachoplenych rasijanami ŭ Kijeŭskaj vobłaści, afarmlali mienavita jak vajennapałonnych.
Heta pieršy viadomy vypadak, kali rasijanie zachapili ŭ pałon cyvilnaha biełarusa.