Litoŭskaj armii dali mahčymaść chutčej i praściej źbivać drony

23 vieraśnia Siejm Litvy zaćvierdziŭ papraŭki ŭ Zakon ab avijacyi i Statut prymianieńnia vajskovaj siły, jakija dazvalajuć armii chutčej i praściej niejtralizavać drony, jakija parušajuć pavietranuju prastoru krainy. Zakon byŭ pryniaty ŭ terminovym paradku, bo nieabchodna nieadkładna abaranić žyćciova važnyja intaresy dziaržavy i hramadstva, paviedamlaje LRT.

Zdymak ilustracyjny. Fota: AP Photo / Efrem Lukatsky

Ministarka abarony Litvy Davile Šakalenie adznačyła, što raniejšyja praviły nie adpaviadali sučasnym pahrozam, a novyja papraŭki dazvalajuć vykarystoŭvać vajskovuju siłu suprać bieśpiłotnikaŭ u zabaronienych abo abmiežavanych zonach, kali jany parušajuć ustalavany paradak.

Raniej armija mahła prymianiać siłu tolki suprać dronaŭ, što vykarystoŭvalisia jak zbroja, a ciapier mahčymaści značna pašyranyja, što dazvolić chutčej reahavać na parušeńni pavietranaj prastory. Pry hetym vajskovaja siła budzie vykarystoŭvacca tolki pry absalutnaj nieabchodnaści z maksimalnymi mierami biaśpieki dla ludziej i majomaści.

Piłoty cyvilnaj avijacyi nie zmohuć lotać u abmiežavanych zonach bieź śpiecyjalnaha dazvołu, a pastaŭščyk aeranavihacyjnych pasłuh abaviazany paviedamlać usim pavietranym sudam pra aktyvacyju abmiežavanych zon nie paźniej čym za 10 chvilin da hetaha. Piłoty pavinny vykarystoŭvać radyjosuviaź i transpondar u niekantralavanaj pavietranaj prastory.

Papraŭki padrychtavanyja z ulikam incydentaŭ hetaha leta, kali ŭ pavietranuju prastoru Litvy zalacieli dva rasijskija drony Gerbera, adzin ź jakich nios vybuchoŭku. U apošnija miesiacy rasijskija bieśpiłotniki nieadnarazova parušali pavietranuju prastoru krain NATA — Polščy, Estonii i Rumynii.

Kamientary da artykuła