U Biełarusi chočuć uvieści padatak na bahaćcie
U Biełarusi płanujecca ŭvieści dadatkovuju staŭku padatku dla bahatych hramadzian. U Saviecie Respubliki heta nazyvajuć «pavyšeńniem spraviadlivaści padatkaabkładańnia».
Uładzisłaŭ Tatarynovič. Fota: STB
Staršynia pastajannaj kamisii Savieta Respubliki pa ekanomicy, biudžecie i finansach Uładzisłaŭ Tatarynovič u intervju telekanału STB zajaviŭ, što ŭ asnovie ekanamičnaj palityki Biełarusy, maŭlaŭ, lažyć sacyjalnaja spraviadlivaść. Hałoŭnyja pryjarytety — pavyšeńnie jakaści žyćcia nasielnictva i jaho abarona, što adlustroŭvajecca ŭ dziaržaŭnych vydatkach, ź jakich značnaja častka nakiravanaja na padtrymku dabrabytu hramadstva.
U suviazi z hetym siarod mier, jakija pavinny być realizavanyja ŭ najbližejšaj pierśpiektyvie, — padatkovyja novaŭviadzieńni dla tych, čyje dachody značna vyšejšyja za siaredni ŭzrovień pa krainie. Havorka idzie pra uviadzieńnie dadatkovaj staŭki padatku na dachody dla hramadzian z vysokimi dachodami.
Akramia taho, płanujecca ŭzmacnieńnie padatkaabkładańnia ŭ dačynieńni da ŭłaśnikaŭ nieruchomaści, čyja płošča kvater ci žyłych damoŭ pieravyšaje siarednija pakazčyki. Taksama budzie ŭraŭnoŭvacca staŭka transpartnaha padatku dla indyvidualnych pradprymalnikaŭ i jurydyčnych asob, pakolki mnohija ź ich zajmajucca adnolkavymi vidami dziejnaści, tamu ŭmovy padatkaabkładańnia, maŭlaŭ, pavinny być roŭnymi dla ŭsich.
Čytajcie taksama:
U Francyi prachodziać maštabnyja pratesty suprać biudžetnaj palityki ŭrada