Łukašenka pavinšavaŭ Armieniju z Dniom Niezaležnaści jak «niedružalubnuju» krainu
Źjaviłasia novaje śviedčańnie paharšeńnia adnosin pamiž Biełaruśsiu i Armienijaj. Alaksandr Łukašenka źmianiŭ farmat vinšavańnia Armienii z Dniom Niezaležnaści: vinšavańnie było adrasavana nie kiraŭnictvu, a «narodu Armienii».
Nikoł Pašynian. Fota: Leon Neal / Getty Images
U pasłańni adznačajecca «šmathadovaje siabroŭstva, tradycyjnyja chryścijanskija kaštoŭnaści i ahulnaja historyja», ale nie zhadvajecca ni prezident, ni premjer-ministr krainy.
Taki farmat kamunikacyi staŭ zvyčajnaj praktykaj dla Biełarusi ŭ dačynieńni da dziaržaŭ, jakija nie pryznali vyniki prezidenckich vybaraŭ 2020 hoda. Pavodle hetaj schiemy, u tekstach ź vinšavańniami nie zhadvajecca ŭłada krain, a ŭsie pažadańni nakiravanyja «narodu».
Jašče ŭ 2023 hodzie Łukašenka nakiroŭvaŭ vinšavańnie nie tolki prezidentu Armienii Vaahnu Chačatranu, ale i premjer-ministru Nikołu Pašynianu.
Ale adnosiny pamiž Pašynianam i Łukašenkam rezka pahoršylisia.
Jany rehularna abmieńvajucca kołkaściami. U studzieni Łukašenka zajaviŭ, što Pašynian, nabližajučysia da Jeŭrasajuza, «źniščaje Armieniju».
«Jany pačali zahulvacca ź ES. Niebiaśpiečnaja hulnia. Supakojcie jaho tam. Jon źniščyć Armieniju. U jaho prablema z adnaho boku — z uschodu, u jaho prablema z zachadu. Jon jašče i Rasiju nastrojvaje suprać siabie. Jon u akružeńni, nievialikaja terytoryja. Nasielnictva nie vielizarnaje. I jon akružyŭ siabie vorahami. Voś, Jeŭrasajuz pačnie jamu tam niečym dapamahać… Jamu što, niezrazumieła, što adbyłosia va Ukrainie? Dobra, Ukraina. Ale Hruzija pobač. Jon źniščyć krainu. Tamu jaho treba ŭcichamiryć. Nielha dapuścić vajny na Kaŭkazie», — skazaŭ Łukašenka.
Pašynian u minułym hodzie zajaviŭ, što nie pryjedzie ŭ Biełaruś, pakul tam kiruje Łukašenka. Armienija taksama zamaroziła svoj udzieł u ADKB.