U Biełarusi pradajuć 24‑hadovuju BMW pa canie kvatery ŭ Minsku. Za što takija hrošy?
Dniami ŭ prodažy źjaviłasia BMW 7 sieryi 2001 hoda, za jakuju prosiać 83 tysiačy dalaraŭ.
Fota: av.by
Restajlinhavaja E38 vypuskałasia z 1999 pa 2001 hady
Pad kapotam u hetaj BMW E38 — topavy dla hetaj madeli 12‑cylindravy ruchavik abjomam 5,4 litra. Mašyna vyjechała z kanviejera viasnoj 2001 hoda, heta značyć, što heta adna z apošnich takich mašyn, bo ad listapada taho hoda vypuskałasia ŭžo novaje pakaleńnie BMW 7‑j sieryi.
Fota: skrynšot z sajta av.by
Zajaŭleny prabieh aŭtamabila — 127 tysiač kiłamietraŭ. U hetaj mašynie, napeŭna, jość usio, što možna było znajści ŭ aŭto pradstaŭničaha kłasa ŭ pačatku XXI stahodździa.
Fota: av.by, kałaž «Naša Niva»
Mašyna znachodzicca ŭ stokavym stanie i vyhladaje vielmi dahledžanaj jak zvonku, tak i ŭ sałonie.
U apisańni pradaviec adznačaje, što aŭtamabil nikoli nie byŭ u DTZ i nie maje nivodnaha farbavanaha elemienta, techničny stan vydatny, łabavoje škło aryhinalnaje i znachodzicca pad bronieplonkaj.
Fota: av.by
Taksama napisana, što hety aŭtamabil byŭ pryhnany z Hiermanii. Pravierka pa vin pakazvaje, što razmytnili hetuju BMW u Biełarusi 27 krasavika 2025 hoda. Mahčyma, niejki čas da hetaha mašyna praciahvała jeździć na niamieckaj rehistracyi, bo ŭ apisańni paznačana, što mašyna była pryvieziena z Hiermanii z prabieham 100 tysiač kiłamietraŭ.
Fota: av.by
Nakolki apraŭdanaja cana?
Madel E38 možna ličyć sapraŭdy kultavaj. Aproč taho, što jaje kličuć «apošniaj sapraŭdnaj siamiorkaj», jana nabyła papularnaść praz zdymki ŭ takich kultavych filmach, jak «Pieravozčyk» i «Bumier».
Taksama varta ŭličvać, što navat pry vykarystańni lhoty pa 140‑m ukazie, razmytnioŭka ŭzrostavaha aŭto z matoram na 5,4 litra kaštavała ŭładalniku amal 16 tysiač jeŭra.
U samoj Hiermanii ciapier pradajecca ŭsiaho dźvie restajlinhavyja BMW e38 z ruchavikom 5,4 i prabieham da 150 tysiač kiłamietraŭ.
Fota: skrynšot z sajta mobile.de
Za samuju tannuju prosiać 29 800 jeŭra (kala 34 tysiačy dalaraŭ), a za samuju darahuju — 42 tysiačy jeŭra (kala 48 tysiač dalaraŭ), praŭda, apošniaja jašče i ŭ viersii «łonh».
Biełaruski ŭładalnik redkaj mašyny ŭ apisańni padkreślivaje, što heta aŭtamabil dla sapraŭdnych znaŭcaŭ.