U Hrecyi padniali na pavierchniu rečy z karabla — «brata» «Tytanika»

U Hrecyi ŭpieršyniu padniali na pavierchniu rečy z zatanułaha łajniera «Brytanik», jaki ličycca «bratam» sumnaviadomaha «Tytanika». Abodva karabli ŭvachodzili ŭ sieryju transatłantyčnych łajnieraŭ kampanii White Star Line, paviedamlaje The Guardian sa spasyłkaj na Ministerstva kultury Hrecyi

Fota: Ministerstva kultury Hrecyi

«Brytanik» byŭ pabudavany jak pasažyrski łajnier, ale padčas Pieršaj suśvietnaj vajny jaho rekvizavali dla patreb brytanskaha fłotu i pieraabstalavali ŭ špitalnaje sudna.

U listapadzie 1916 hoda kala vostrava Kieja ŭ Ehiejskim mory karabiel padarvaŭsia na niamieckaj minie i patanuŭ mienš čym za hadzinu. Z bolš jak tysiačy čałaviek na borcie zahinuła tryccać — pieravažna z-za taho, što vinty sudna začapili dźvie ratavalnyja šlupki.

Fota: Ministerstva kultury Hrecyi

Ciapier ža ŭpieršyniu z hłybini bolš za 120 mietraŭ dajviery dastali šerah kaštoŭnych artefaktaŭ:

• karabielny zvon z naziralnaha pasta;
• sihnalny lichtar;
• partatyŭnaje abstalavańnie z kajut pieršaha i druhoha kłasaŭ;
• kieramičnuju plitku z tureckaj łaźni na borcie;
• binokl.

Fota: Ministerstva kultury Hrecyi

Fota: Ministerstva kultury Hrecyi

Ministerstva kultury Hrecyi adznačaje, što praca viałasia ŭ składanych umovach — na vialikaj hłybini, pry mocnych ciačeńniach i kiepskaj bačnaści. Niekatoryja abjekty pakul nie ŭdałosia padniać z-za ich miescaznachodžańnia abo drennaha stanu.

Znojdzienyja pradmiety dastavili ŭ Afiny, dzie jany prajšli praz praceduru kansiervacyi. U budučyni jany stanuć častkaj pastajannaj ekspazicyi ŭ muziei padvodnych staražytnaściaŭ u Pirei, jaki ciapier stvarajecca.

Kamientary da artykuła