«Adzin špryc na ŭsich». U rasijskaj armii epidemija VIČ i hiepatytu

Aficyjnaja prapahanda pačynaje aściarožna kazać, što epidemija jašče tolki naśpiavaje. Ale rasśledavańnie žurnalistaŭ «Novaj haziety Jeŭropa» śćviardžaje, što situacyja našmat horšaja.

Hrupa rasijskich mabilizavanych. Fota: Minabarony Rasii

«Rasijskaja vajennaja apieracyja pieratvaryłasia ŭ ačah epidemij, nastupstvy jakich vyjduć daloka za miežy linii frontu», — papiaredžvaje aŭtar artykuła ŭ «Novaj haziecie Jeŭropa» Illa Vołžski.

Pa słovach aŭtara, u toj čas jak aficyjnaja prapahanda tolki pačynaje kazać pra toje, što «naśpiavaje epidemija», na froncie chvaroby ŭžo stali častkaj štodzionnaści. Vajskoŭcy vymušany chavać svaje dyjahnazy, kab atrymać kantraktnyja vypłaty, u špitalach katastrafična nie chapaje lekaŭ i sterylnych miedycynskich instrumientaŭ, a ŭ akopnych umovach infiekcyi raspaŭsiudžvajucca z šalonaj chutkaściu.

Naśpiavaje epidemija

Aŭtar spasyłajecca na słovy rasijskaj prapahandystki Anastasii Kašavaravaj, jakaja paviedamiła, što ŭ vojsku płanujuć pieraniać dośvied PVK «Vahnier», dzie isnavaŭ asobny atrad Umbrella dla bajcoŭ ź VIČ i hiepatytam.

Pavodle jaje słoŭ, ciapier u armii słužyć šmat kantraktnikaŭ ź VIČ, hiepatytami, ankałohijaj i navat suchotami, jakija trapili na słužbu pa padroblenych daviedkach dziela hrošaj. Tamu było vyrašana farmavać z takich vajskoŭcaŭ, jakija majuć katehoryju prydatnaści «V» (abmiežavana prydatny), asobnyja padraździaleńni. Ich abaviažuć nasić admietnyja paviazki ŭ zaležnaści ad dyjahnazu, a asnoŭnaj zadačaj stanie ŭtrymańnie abarončych rubiažoŭ.

Kašavarava, jakuju cytuje vydańnie, tłumačyć, što pramoj zabarony na ŭdzieł u vajnie dla takich sałdat niama, bo poŭnaje vyzvaleńnie ad słužby daje tolki katehoryja «D».

«Tyja, chto chvareje daŭno, paharšaŭ zachvorvańnie ŭžyvańniem ałkaholu/narkotykaŭ, a potym pajšoŭ padpisvać kantrakt, — ich albo sadžać za machlarstva, albo, kali atrymali vypłaty, niachaj słužać u asobnym padraździaleńni. Tak budzie spraviadliva. A našeńnie paviazak — pravilna, miedyki, evakuacyjnyja hrupy buduć viedać, što bajec chvory, i pavyšanuju ŭvahu nadavać pry kantakcie i apieracyjach», — ličyć prapahandystka.

Rasadnik chvarob

Raniej Kašavarava apisvała front jak idealnaje asiarodździe dla raspaŭsiudžvańnia chvarob: «Tam, dzie śmierć, pobač zaŭsiody błukaje chvaroba i jaje raznosčyki — pacuki, myšy, vošy».

Jak śćviardžaje prapahandystka, paśla značnych strat na pačatku vajny ŭ vojska pačali masava nabirać byłych źniavolenych i inšych ludziej ź VIČ i hiepatytam. Da taho ž na froncie kvitnieje narkamanija, što taksama spryjaje raspaŭsiudžvańniu infiekcyj. U vyniku, znachodziačysia ŭ adnym akopie ci na adnym apieracyjnym stale, zdarovyja vajskoŭcy lohka zaražajucca.

Asabliva vostra staić prablema z hiepatytam S, jaki, pa słovach Kašavaravaj, pieratvaryŭsia ŭ sapraŭdnuju epidemiju. Lačeńnia ŭ vojsku praktyčna niama, a chvorych nie zvalniajuć.

«Na hramadziancy realna pavinny zadumacca — staić pahroza epidemii sacyjalna niebiaśpiečnych zachvorvańniaŭ. Hiepatyt, VIČ, suchoty — ciapier heta zakranaje vojska i raspaŭsiudžvajecca na frantavyja rehijony, dalej pojdzie i ŭhłyb Rasii», — zajaviła Kašavarava.

Hrupa mabilizavanych rasijskich hramadzian. Fota: sacyjalnyja sietki

Źniavolenyja i narkamany

Infarmacyju prapahandystki paćviardžaje ananimny rasijski doktar, jaki zajmajecca reabilitacyjaj paranienych. Pavodle jaho słoŭ, vielizarny pracent armii składajuć byłyja źniavolenyja, narkamany i ludzi z sacyjalna nieabaronienych słajoŭ. Jon adznačaje, što mnohija mabilizavanyja z tak zvanych «DNR» i «ŁNR» užo mieli surjoznyja prablemy sa zdaroŭjem.

Doktar śćviardžaje, što sustrakaŭ navat bajcoŭ z adkrytaj formaj suchotaŭ, jakija mahli zarazić dziasiatki tavaryšaŭ pa słužbie.

Aŭtar taksama spasyłajecca na słovy aficera miedycynskaj słužby, jaki raspaviadaje pra tak zvanyja «akopnyja chvaroby», hałoŭnaja ź jakich — suchoty. Praz antysanitaryju, drennaje charčavańnie i stres u sałdat rezka padaje imunitet.

Pa słovach doktara-reabilitołaha, da pałovy rasijskich źniavolenych, jakija iduć na słužbu, — byłyja narkamany, jakija ŭ vojsku viartajucca da svaich zhubnych zvyčak. Pakolki z ałkahalizmam na pieradavoj u mnohich padraździaleńniach pačali surjozna zmahacca, značnaja častka sałdat, jakija zachaplajucca roznymi rečyvami, pierajšła na narkotyki.

Aŭtar apisvaje historyju mabilizavanaha Alaksandra Kuźniacova, u jakoha paśla ranieńnia vyjavili chraničny hiepatyt S. Niahledziačy na dyjahnaz, kamisija pryznała jaho prydatnym da słužby. Pa słovach miedykaŭ, jakich cytuje vydańnie, kab być zvolnienym z hiepatytam, treba mieć cyroz piečani i atrymać invalidnaść I hrupy.

Akramia taho, jość i historyi adkrytaha machlarstva. Tak, sałdat Pavieł Ščapocin pryznaŭsia na dopycie, što kupiŭ padroblenyja daviedki, kab schavać hiepatyt S, suchoty i jazvu straŭnika. Za pasłuhi pasiarednika, jaki damoviŭsia ź miedykami ŭ Dahiestanie, Ščapocin pavinien byŭ zapłacić kala $4000. 

Kantraktniki ź VIČ

Aŭtar artykuła cytuje «Vajenna-miedycynski časopis», paviedamlajučy pra vybuchovy rost zachvorvańnia na VIČ u vojsku. U paraŭnańni z davajennym pieryjadam u kancy 2023 hoda kolkaść vypadkaŭ vyrasła ŭ 20 razoŭ.

Pavodle danych, jakija pryvodzić vydańnie, amal usie infikavanyja (99,8%) — kantraktniki. Amal usie ź ich — sałdaty i matrosy (93,5%), nievialikaja častka — aficery (4,4%), praparščyki i mičmany (1,8%), a taksama kursanty (0,1%).

Mnohija ź ich viedali pra svoj dyjahnaz, ale vykarystoŭvali fiktyŭnyja daviedki, kab atrymać kantrakt i vypłaty. Aŭtary daśledavańnia adznačajuć, što realnyja ličby mohuć być značna vyšejšymi praz prablemy z dyjahnostykaj.

Vajskoŭcy rasijskaj armii. Fota: AP Photo / Alexei Alexandrov

Adzin špryc na ŭsich

Masavaje zaražeńnie, jak tłumačycca ŭ artykule, adbyvajecca nie tolki praz narkamaniju, ale i padčas akazańnia miedycynskaj dapamohi.

Pa słovach doktara-reabilitołaha, u ich špitali sotni vajskoŭcaŭ, jakija zachvareli na VIČ. Jość navat śpiecyjalnyja pałaty dla chvorych na VIČ i adnačasova na adkrytuju formu tubierkulozu.

Inšy surazmoŭca sa śfiery epidemijałohii patłumačyŭ, što rasijskija vajskoŭcy mahli masava zarazicca VIČ i paśla trapleńnia na front — praz parušeńni praviłaŭ asieptyki pry akazańni miedycynskaj dapamohi.

«U vajennych umovach šprycy majuć ułaścivaść vielmi chutka zakančvacca», — adznačaje śpiecyjalist. Hetyja słovy paćviardžaje vajenny miedyk, słovy jakoha cytuje vydańnie, apisvajučy ŭmovy ŭ pryfrantavych špitalach: «Usiudy kroŭ. (…) Navat apieracyjnyja pradezynfikavać my tołkam nie možam». Pavodle jaho słoŭ, paŭtorna vykarystoŭvajucca nie tolki šprycy, ale i chirurhičnyja instrumienty.

Aŭtar spasyłajecca na materyjał Centra Karnehi, u jakim śćviardžajecca, što vajna značna pahoršyła situacyju z epidemijaj VIČ. Heta adbyłosia z-za źmieny pryjarytetaŭ u achovie zdaroŭja i źnižeńnia vyjaŭlalnaści chvaroby, bo ludzi pierastali prachodzić rehularnyja ahlady.

Akramia pieradačy infiekcyi praz ranieńni, u vojsku praćvitajuć i tradycyjnyja šlachi: nieabaronienyja pałavyja kantakty i injekcyi narkotykaŭ ahulnaj ihołkaj. Hetamu spryjaje samo armiejskaje asiarodździe, dzie sałdaty ź vialikimi hrašyma žyvuć «apošnim dniom».

Pry hetym usplosk adbyvajecca na fonie taho, što VIČ farmalna źjaŭlajecca padstavaj dla pryznańnia nieprydatnym da vajskovaj słužby. Ale na spravie ŭsio inakš. U jakaści prykładu aŭtar pryvodzić vypadak, kali žychara Śviardłoŭskaj vobłaści ź ciažkaj stadyjaj VIČ mabilizavali na vajnu druhi raz.

Fota: Pres-słužba Ministerstva abarony Rasii / AR

Čumny barak

Jak adznačaje aŭtar, ekśpierty, apytanyja vydańniem, ličać ideju stvareńnia asobnych padraździaleńniaŭ dla chvorych nierealnaj, bo na froncie nichto nie pravodzić sistematyčnaha abśledavańnia. Aŭtar spasyłajecca na słovy doktara-reabilitołaha, jaki nazyvaje hetuju prapanovu stvareńniem «čumnoha baraka».

Pavodle jaho słoŭ, u takim padraździaleńni śmiarotnaść budzie pavyšanaja navat nie ŭ bai, bo «jany ž usie adzin adnaho pierazaražajuć. Praz tydzień usie pahałoŭna buduć z suchotami. Praź miesiac — z hiepatytam». Lačyć ich budzie niama dzie, bo špitali i tak pierapoŭnienyja paranienymi.

Śpiecyjalist padkreślivaje, što nieabchodna ŭličvać, što ŭ armii ŭžo lutuje epidemija ciažkich zachvorvańniaŭ. Kali nastupić mir i ŭ rasijskija harady vierniecca vielizarnaja kolkaść demabilizavanych, jany pryniasuć z saboj rezki skačok raspaŭsiudžańnia roznych chvarob, da čaho rasijskaja miedycyna, chutčej za ŭsio, nie budzie hatovaja.

Kamientary da artykuła