Architektar nazvaŭ toje, što zrabili ŭ Niaśvižy, «karnym uparadkavańniem»
Pierad kaściołam Božaha Cieła ŭ Niaśvižy źniščyli ŭsie drevy i kusty ŭ skviery, pieratvaryŭšy jaho ŭ hoły plac z šeraj plitki i ź biezhustoŭnymi łavami. Toje samaje zrabili ŭ Łošycy.
Uparadkavańnie skviera pierad kaściołam Božaha Cieła ŭ Niaśvižy. Fota: «Kultura i Mastactva»
Telehram-kanał «Spadčyna» źviarnuŭ uvahu na źmieny, jakija adbylisia ŭ histaryčnym centry Niaśviža, nazvaŭšy heta «karnym uparadkavańniem».
Raniej na rahu vulic Hiejsika i Adama Mickieviča byŭ skvier z drevami, jakija pryhoža abramlali vydatnuju baročnuju architekturu kaścioła, ale ciapier usio pieramianiłasia.
Skvier u kancy 2010‑ch hadoŭ, kali pačynałasia restaŭracyja kaścioła. Fota: Huhł Karty
Skvier paśla zaviaršeńnia restaŭracyi kaścioła. Drevy ŭpryhožvali i dapaŭniali bahatuju baročnuju architekturu chrama. Fota: Wikimedia Commons
Histaryčny centr Niaśviža sa skvieram pierad kaściołam da jaho «karnaha ŭparadkavańnia». Fota: planetabelarus.by
Źmieny, vidać, adbylisia letaś. U skvieryku byli śpiłavanyja ŭsie drevy i navat kusty, zamiest ich źjavilisia tonkija maładyja dubcy. Miarkujučy pa fota hetaha hoda, nielha skazać, što hetyja dubcy prynialisia — siaredzina leta, a na ich ź ciažkaściu možna razhledzieć liście. Kali i vyžyvuć, to prystojny vyhlad jany nabuduć tolki praź dziesiacihodździ.
Zamiest narmalnych drevaŭ u skviery ciapier tonkija prutki, jakija vyrastuć da narmalnych pamieraŭ tolki praź dziesiacihodździ. Fota: Huhł Karty
Ciapier hałoŭnym akcentam płoščy staŭ hoły plac ź plitki, na jakim siratliva stajać biezhustoŭnyja kavanyja łavy — ŭsio hetaje kałhasnaje ŭparadkavańnie nijak nie stasujecca z uzroŭniem architektury i značeńniem kaścioła Božaha Cieła.
Kusty, pasadžanyja letaś, siońnia vyhladajuć zusim sumna. Fota: Huhł Karty
U skviery ciapier niama dzie schavacca ad sonca, vietru i daždžu — spyniacca ŭ takim miescy niepryjemna. Fota: Huhł Karty
Asobnaja razynka — mietaličnaja kłumba ŭ vyhladzie čornaha rajala, čyja deka ŭpryhožanaja adnahadovymi kvietkami. Kvietkavy rajal staić na pastamiencie z čornaha kamieniu, nahadvajučy chutčej prybrany pachavalny katafałk.
Kłumba ŭ vyhladzie ci to rajala, ci to katafałka. Fota: Huhł Karty
Takoje ŭparadkavańnie, kali vyniščajecca ŭsio azielanieńnie i stvarajucca biezžyćciovyja prastory z ubohaj vuličnaj meblaj, u jakich prosta niekamfortna znachodzicca čałavieku, stała sapraŭdnym pakarańniem małych haradoŭ i sielskaj miascovaści ŭ apošniaje dziesiacihodździe.
Husta nasielenyja i ščylna zabudavanyja bujnyja harady Biełarusi paradaksalnym čynam stanoviacca zielaniejšyja za rajcentry i vioski.
Zrešty, durnuju modu i siudy prynosiać z saboj čynoŭniki, jakich pryznačajuć u abłasnyja centry z pravincyi. Litaralna na dniach u Minsku adkryli paśla rekanstrukcyi haspadarčy dvor Łošyckaj siadziby. U centry zamiest narmalnaha ŭparadkavańnia — biaźmiežny plac ź plitki, pasiarod jakoha hetak ža siratliva stajać tyja samyja kavanyja łavy.
Paradkavańnie terytoryi haspadarčaha dvara Łošyckaj siadziby, stvoranaje ŭ čas niadaŭna skončanaj rekanstrukcyi. Fota: Anłajnier