Znoŭ aryštavany były biełsataviec Aleś Lubiančuk. Jon vyjšaŭ z kałonii paŭhoda tamu
Apieratar całkam adbyŭ pryznačany jamu trochhadovy turemny termin.
Aleś Lubiančuk. Fota Baj.media
Stała viadoma pra novy aryšt eks-palitviaźnia Alesia Lubienčuka. Były apieratar «Biełsata» ŭtrymlivajecca ŭ SIZA.
Aleś Lubiančuk da 2020 hoda supracoŭničaŭ z «Biełsatam», traplaŭ na sutki za pracu na paślavybarčych akcyjach pratestu. Kali praca ŭ Biełarusi stała niemahčymaj, adyšoŭ ad žurnalistyki, ale zastaŭsia ŭ krainie.
Lubiančuk zajmaŭsia dabračynnaściu, dapamahaŭ dzieciam-sirotam, arhanizoŭvaŭ turystyčnyja pachody i adnaŭlaŭ historyka-kulturnuju spadčynu Navahradčyny.
Aleś byŭ aryštavany ŭ mai 2022 hoda. Jamu inkryminavali supracoŭnictva z «Biełsatam» jak udzieł u «ekstremisckim farmavańni» i prysudzili 3 hady źniavoleńnia. Lubiančuk całkam adbyŭ pryznačanaje pakarańnie ŭ kałonii №15 Mahilova i vyjšaŭ pa skančeńni terminu ŭ studzieni 2025 hoda.
Pryčyna čarhovaha aryštu pakul nieviadomaja.