Pratestoŭcy ŭ Katmandu padpalili rezidencyju prezidenta i premjera
Pratestoŭcy padpalili hatel Hilton, rezidencyju premjera, prezidenta i budynak parłamienta ŭ Niepale. U hetaj azijackaj krainie ŭčora ŭspychnuli masavyja pratesty z-za błakiroŭki dvuch dziasiatkaŭ miesiendžaraŭ. Pratesty nazvali revalucyjaj zumieraŭ.
Skrynšot videa
5 vieraśnia miascovyja ŭłady zabłakavali YouTube, X (były Twitter), Reddit, LinkedIn, WhatsApp, Facebook, Instagram. Urad zapatrabavaŭ, kab usie płatformy pryznačyli ŭ krainie aficyjnych pradstaŭnikoŭ, ale nie ŭsie sacsietki paśpieli heta zrabić.
Učora tysiačy maładych ludziej vyjšli na vulicy stalicy krainy Katmandu i zładzili pratesty. Siaredni ŭzrost pratestoŭcaŭ, pavodle danych niepalskich ŚMI, 15—25 hadoŭ.
Dla razhonu demanstrantaŭ užyvali ślezaciečny haz i adkryvali ahoń — u vyniku zahinuli 19 čałaviek, bolš za 500 paciarpieli, u tym liku 28 palicejskich.
Na fonie pratestaŭ byŭ časova zakryty aeraport u stalicy Niepała — Katmandu, a ŭsie rejsy admienieny.
Siońnia ŭrad zajaviŭ, što nie budzie błakavać miesiendžary, a premjer Niepała Šarma Oli padaŭ u adstaŭku. Usiaho za niekalki hadzin da svajoj adstaŭki Oli zaklikaŭ pratestoŭcaŭ da miru i strymanaści, uprošvajučy šukać rašeńni šlacham dyjałohu. Tym nie mienš, kiraŭnika ŭrada paprasiŭ pakinuć pasadu hałoŭnakamandujučy armijaj hienierał Ašok Radž Sihdel.
Armii krainy daviałosia terminova na viertalotach evakujavać ministraŭ z aeraporta.