U ZŠA aryštavali biełarusa Artura Siańko, jaki zajaŭlaje, što na radzimie jamu pahražaje palityčny pieraśled
36-hadovy Artur Siańko byŭ zatrymany imihracyjnaj palicyjaj (ICE) 15 žniŭnia i źmieščany ŭ turmu. Ab hetym Reform.news raspavioŭ jaho siabar.
Biełarus znachodziŭsia na terytoryi ZŠA lehalna. 26 žniŭnia 2021 hoda Artur Siańko prybyŭ u punkt propusku ŭ Otay Mesa Port of Entry, štat Kalifornija, dzie zajaviŭ pra bojaź pieraśledu i paprasiŭ palityčnaha prytułku.
Takuju praceduru praduhledžvaje Zakon ab imihracyi i hramadzianstvie. Siańko minimum z 2022 hoda znachodzicca ŭ miždziaržaŭnym vyšuku pa palityčnym artykule 369 KK RB — abrazy pradstaŭnika ŭłady.
Praz dva dni paśla prybyćcia ŭ ZŠA jon byŭ vyzvaleny da dalejšaha razhladu biez pryznačeńnia sudu. Paśla hetaha jon padaŭ piśmovuju zajavu ab pradastaŭleńni palityčnaha prytułku, a na praciahu ŭsiaho času znachodžańnia ŭ ZŠA supracoŭničaŭ ź imihracyjnymi orhanami, davaŭ kantaktnyja danyja i infarmacyju ab miescy svajho znachodžańnia.
15 žniŭnia 2025 hoda jaho vyklikali pozvaj u pradstaŭnictva Departamienta ŭnutranaj biaśpieki ZŠA (U.S. Department of Homeland Security) u Ńju‑Jorku.
Artur Siańko pryjechaŭ tudy z advakatam. Dovady advakata ab jaho zakonnym znachodžańni ŭ ZŠA jak prośbita prytułku nie byli pryniatyja.
Imihracyjnyja aficery admovilisia razhladać dakumienty. Arturu Siańko nadzieli kajdanki i advieźli ŭ izalatar. U dadatak supracoŭniki mihracyjnaj słužby prapanavali jamu padpisać dakumient, što data, miesca i abstaviny jaho prybyćcia ŭ ZŠA nieviadomyja, ad čaho jon admoviŭsia, bo heta supiarečyć realnaści.
Sudovyja słuchańni pa spravie Artura Siańko byli pryznačanyja na 20 i 27 žniŭnia, ale nie adbylisia z-za jaho pieramiaščeńniaŭ pa izalatarach, nie adbyłosia taksama słuchańnie 3 vieraśnia.
Čarhovaje słuchańnie pryznačana na 10 vieraśnia. Biełarus baicca, što ŭ vyniku jaho departujuć, bo jon ciapier u vypraŭlenčym centry štata Ńju‑Mieksika, dzie asudžanyja amal nie atrymlivajuć stanoŭčych rašeńniaŭ pa spravach ab departacyi.
Taksama ŭ biełarusa vyklikaje tryvohu asoba sudździ. Pavodle jaho advakata, sudździa Semiuel Uiljams, jaki pačaŭ pracavać tolki ŭ 2024 hodzie, praktyčna nie vynosić rašeńniaŭ u karyść prośbitaŭ prytułku.
«Ja vielmi ŭdziačny prezidentu Trampu i administracyi Biełaha doma za vyzvaleńnie 14 palityčnych źniavolenych u Biełarusi. Heta sapraŭdny cud! Prezident Tramp pracuje nad vyzvaleńniem palityčnych źniavolenych u Biełarusi i nieadnarazova zajaviŭ ab nieabchodnaści vyzvalić usich palityčnych źniavolenych.
Ale ŭ toj ža čas departacyja takich ludziej, jak Artur Siańko, tolki papoŭnić śpisy palityčnych źniavolenych u Biełarusi.
Dabivacca vyzvaleńnia ludziej u Biełarusi, a potym aryštavać ich u ZŠA i adpravić na raspravu mańjaku nazad u Biełaruś, kab potym znoŭ zmahacca za ich vyzvaleńnie?! Heta vielmi dziŭnaja praktyka», — prakamientavaŭ situacyju siabar i biznes-partnior Artura Siańko, jaki pažadaŭ zastacca nienazvanym (kantaktnyja dadzienyja jość u redakcyi Reform.news).