Biaspłatnaja vakcynacyja biełarusak ad virusa papiłomy čałavieka znoŭ adkładajecca
Vakcyna suprać virusa papiłomy čałavieka dla biaspłatnaj vakcynacyi dziaŭčat va ŭzroście 11 hadoŭ musiła pastupić u arhanizacyi achovy zdaroŭja Biełarusi jašče ŭ mai — tady Minzdaroŭja płanavała zabiaśpiečyć usich pieršaj dozaj vakcyny, a ŭ kastryčniku-listapadzie 2025‑ha ŭžo i druhoj. Ale praz łahistyčnyja zatrymki hetyja terminy pasunulisia — spačatku miedyki aryjentavali, što pačnuć pryščaplać u vieraśni, ciapier ź niaŭpeŭnienaściu spadziajucca na kastryčnik.
Ilustracyjnaje fota. Krynica: pixabay.com
Pa aficyjnaj viersii Minzdaroŭja, heta źviazana z pytańniami, jakija ŭźnikli da pastaŭščyka, ź jakim pieršapačatkova vialisia pieramovy — ciapier jon u «čornym» śpisie.
«Pastaŭščyk pryniaŭ abaviazak pastavić vakcynu ŭ vyznačany termin, adnak nie vykanaŭ jaho. Uličvajučy, što biełaruskija śpiecyjalisty dahetul nie atrymali ad vytvorcy infarmacyju pra prachodžańnie finalnaha kantrolu jakaści, jaki paćviardžaje biaśpieku vakcyny, pryniata rašeńnie ab razryvie kantraktu i praviadzieńni novaj pracedury dziaržaŭnaj zakupki», — infarmavali ŭ Ministerstvie.
Paśla hetaha pačalisia pošuki novaha pastaŭščyka.
«Spadziajemsia, damova ź inšym pastaŭščykom budzie padpisanaja, i ŭ ideale my zmožam pačać vakcynacyju ŭ kastryčniku», — paviedamili žurnalistu «Našaj Nivy» jak pryvatnaj asobie ŭ Viciebskim abłasnym centry hihijeny, epidemijałohii i hramadskaha zdaroŭja. «Tak ci inakš, kali dziaŭčyna-padletak była raniej pastaŭlenaja ŭ čarhu, jana budzie pryščeplenaja. Taksama ŭsie dziaŭčynki 2014 hoda naradžeńnia atrymajuć vakcyny biaspłatna, jany tut u pryjarytecie».
U zajaŭcy Minzdaroŭja na zakupku lekavych srodkaŭ u 2025 hodzie na vakcynu suprać virusa papiłomy čałavieka było zapłanavana vydatkavać 12 066 615,52 rubloŭ.
Nahadajem, u śviecie vakcynacyja ad VPČ pačałasia ŭ 2006 hodzie. Aŭstralija adnoj ź pieršych ukaraniła nacyjanalnuju prahramu vakcynacyi suprać VPČ. Bolš za 125 krain śvietu ŭklučyli vakcynu ad VPČ u svaje nacyjanalnyja prahramy imunizacyi dziaŭčynak, a 47 krain — i chłopčykaŭ. Siarod ich Litva, Polšča, Hruzija, Kazachstan, Uźbiekistan, Ałbanija i inšyja. U niekatorych z hetych krain vakcyna całkam biaspłatnaja ci finansujecca ź biudžetu vyklučna dla niepaŭnahadovych.
U Biełarusi daŭno išło abmierkavańnie, kab unieści vakcynacyju ad VPČ u nacyjanalny kalandar pryščepak i rabić jaje biaspłatna. U 2024 hodzie takoje rašeńnie narešcie było pryniataje dla 11‑hadovych biełarusak.