11-hadovy školnik u Klimavičach vynies z pałajučaj kvatery dvuchhadovaha brata
Dzieci byli doma adny, kali pačaŭsia pažar, paviedamlaje MNS.
Skrynšot videa MNS
Zdareńnie adbyłosia 2 vieraśnia ŭ kvatery na vulicy Ratavalnikaŭ.
U kvatery pražyvaje šmatdzietnaja siamja — baćki i 6 dziaciej. Ratavalnikaŭ vyklikaŭ 11-hadovy syn haspadaroŭ. Chłopčyk z dvuchhadovym bratam byli doma adny.
Školnik pačuŭ huk, jak spracavaŭ aŭtanomny pažarny apaviaščalnik, zaŭvažyŭ uzharańnie na bałkonie i dym u pakoi. Jon nie razhubiŭsia, zabraŭ małodšaha brata i razam ź im pakinuŭ kvateru.
Akazaŭšysia ŭ biaśpiecy, chłopčyk patelefanavaŭ u słužbu MNS i paviedamiŭ pra pažar.
Ratavalniki likvidavali pažar. Nichto nie paciarpieŭ. Evakuacyja žycharoŭ padjezda nie spatrebiłasia. Pryčyna incydentu ŭstanaŭlivajecca.