11-гадовы школьнік у Клімавічах вынес з палаючай кватэры двухгадовага брата
Дзеці былі дома адны, калі пачаўся пажар, паведамляе МНС.
Скрыншот відэа МНС
Здарэнне адбылося 2 верасня ў кватэры на вуліцы Ратавальнікаў.
У кватэры пражывае шматдзетная сям’я — бацькі і 6 дзяцей. Ратавальнікаў выклікаў 11-гадовы сын гаспадароў. Хлопчык з двухгадовым братам былі дома адны.
Школьнік пачуў гук, як спрацаваў аўтаномны пажарны апавяшчальнік, заўважыў узгаранне на балконе і дым у пакоі. Ён не разгубіўся, забраў малодшага брата і разам з ім пакінуў кватэру.
Аказаўшыся ў бяспецы, хлопчык патэлефанаваў у службу МНС і паведаміў пра пажар.
Ратавальнікі ліквідавалі пажар. Ніхто не пацярпеў. Эвакуацыя жыхароў пад’езда не спатрэбілася. Прычына інцыдэнту ўстанаўліваецца.