U Finlandyi pasadzili ŭ turmu lidara nihieryjskich sieparatystaŭ
Lidar nihieryjskich sieparatystaŭ Sajman Ekpa byŭ asudžany ŭ Finlandyi za teraryzm, zakliki da hvałtu i padatkovyja machinacyi. Sud pryznačyŭ jamu šeść hadoŭ turmy, paviedamlaje Euronews.
Akcyja sieparatystaŭ IPOB. Fota: AP
Sajman Ekpa, jaki daŭno žyvie ŭ Finlandyi, kiruje arhanizacyjaj Indigenous Peoples of Biafra (IPOB), jakuju abvinavačvajuć u zabojstvach i vykradańniach ludziej na paŭdniovym uschodzie Nihieryi. Sud adznačyŭ, što jon padtrymlivaŭ baraćbu za niezaležnaść Bijafry niezakonnymi mietadami, u tym liku pastaŭlajučy zbroju, vybuchovyja rečyvy i bojeprypasy.
U 2024 hodzie nihieryjskaja armija pryznała Ekpu adnym z samych niebiaśpiečnych terarystaŭ krainy i ŭklučyła ŭ śpis 100 asob, jakija najbolš vyšukvajucca. Paśla jaho zatrymańnia ŭ Finlandyi Nihieryja zapatrabavała ekstradycyi.
IPOB daŭno patrabuje adnaŭleńnia dziaržavy Bijafra, jakaja isnavała ŭ 1967—1970 hadach na paŭdniovym uschodzie Nihieryi, bahatym na naftu. Sieparatysckija vystupleńni skončylisia hramadzianskaj vajnoj, u jakoj zahinuła kala troch miljonaŭ čałaviek. U 2017 hodzie dziejnaść hrupy ŭ Nihieryi zabaranili.
Ekpa ŭznačaliŭ IPOB paśla jaje zasnavalnika Namdzi Kanu, jaki byŭ aryštavany ŭ 2021 hodzie praź Interpał u Kienii i pieradadzieny ŭładam Nihieryi, dzie znachodzicca ŭ turmie da hetaha času. Paśla aryštu Kanu IPOB zabaraniła ŭ rehijonie pa paniadziełkach lubyja kamiercyjnyja dziejańni i zahadała ludziam u hety dzień «siadzieć doma». Takaja forma pratestu pryviała da hibieli kala 700 čałaviek i naniesła škodu ekanomicy Nihieryi na 7,6 tryljona najraŭ (prykładna 4 miljardy jeŭra).
Čytajcie taksama:
Prarasijski rehijon Afryki, dzie zabili vahnieraŭcaŭ, abjadnaŭsia ŭ kanfiederacyju. Dziela čaho?
U Nihieryi zabaranili tvitar paśla taho, jak sacsietka vydaliła tvit prezidenta krainy
«Jany horšyja za francuzaŭ, my trapili z ahniu dy ŭ połymia». Jak «Vahnier» pravaliŭsia ŭ Mali