Dzie ŭ Minsku źbirajucca zrabić jašče adnu ałmaznuju raźviazku

Śledam za niezvyčajnaj ałmaznaj raźviazkaj na pierasiačeńni MKAD — Ihumienskaha trakta i vulicy Babuškina ŭ stalicy źbirajucca zrabić jašče adnu.

Asablivaść ałmaznaj raźviazki ŭ tym, što na joj adbyvajecca źmiena bakovaści ruchu — stvarajecca ŭražańnie vyjezdu na sustrečnuju pałasu. Na pieršy pohlad zdajecca, što pačatkoŭcu za rulom tut budzie nie prosta razabracca, ale kali stroha prytrymlivacca raźmietki i znakaŭ — nie zabłukaješ.

U stalicy mohuć źjavicca jašče padobnyja ałmaznyja raźviazki. Adnoj ź pieršych u hetym śpisie staić balučaja častka darohi ŭ Uruččy — učastak praśpiekta Niezaležnaści sa źjezdam na vulicu Rusijanava, pišuć «Minsk-Naviny».

— Heta dazvalaje pavysić prapusknuju zdolnaść levych pavarotaŭ biez kanfliktu z sustrečnym kirunkam, raźvieści ich u asnoŭnaj fazie. Taksama dazvalaje prapuścić tranzitny kirunak i źjezdy naprava, — rastłumačyŭ raźviazku na MKAD i Ihumienskim trakcie namieśnik načalnika ŭpraŭleńnia DAI HUUS Minharvykankama Dźmitryj Livanovič.

Za niekalki mietraŭ da jaje pačatku stajać papieradžalnyja infarmacyjnyja ščyty, a jaskravaja čyrvonaja raźmietka na asfaltavym pakryćci adrazu pakazvaje, kudy zabaroniena ŭjazdžać. U pieršyja dni staličnaja DAI na novaj raźviazcy pilna sačyła za rucham mašyn, ale tolki ŭ pikavyja hadziny — ranicaj i viečaram.

Kamientary da artykuła