Źjavilisia pieršyja fota mierkavanaha zabojcy Andreja Parubija
Jak paviedamlaje krynica 5 kanała, rasijskija śpiecsłužby ceły hod trymali jaho pad šantažom, vykarystoŭvajučy infarmacyju pra cieła syna, jaki zahinuŭ na vajnie.
U Nacpalicyi zajavili, što mierkavany zabojca Andreja Parubija zahadzia rychtavaŭsia da złačynstva i detalova jaho płanavaŭ.
Jon ździejśniŭ vosiem strełaŭ i pierakanaŭsia, što achviara zahinuła. Paśla hetaha sprabavaŭ schavać ślady: pieraapranuŭsia, pazbaviŭsia zbroi i nakiravaŭsia chavacca na Chmialniččynu.
Mierkavanaha zabojcu zatrymali ŭčora ŭviečary.
«Mierkavanaha strałka niekalki chvilin tamu zatrymali na Chmialniččynie. Šmat detalaŭ ciapier nie budzie. Tolki skažu, što złačynstva było staranna padrychtavana: vyvučaŭsia hrafik pieramiaščeńniaŭ zahinułaha, prakładaŭsia maršrut, pradumvaŭsia płan uciokaŭ», — paviedamiŭ učora pozna viečaram ministr unutranych spraŭ Ihar Klimienka.
Palicejskija i supracoŭniki SBU, jak paviedamlajecca, vyjšli na pramy śled strałka ŭžo praz 24 hadziny paśla zdareńnia, a praz 36 hadzin — zatrymali. Bolš detalaŭ abiacajuć dać paśla.
Były śpikier Viarchoŭnaj Rady, dziejny narodny deputat ad palityčnaj siły «Jeŭrapiejskaja salidarnaść» Andrej Parubij byŭ zabity ŭ Lvovie 30 žniŭnia. Heta adbyłosia na vulicy Jafremava, u Andreja Parubija stralaŭ nieviadomy. Ad ahniastrelnych ranieńniaŭ palityk zahinuŭ na miescy.
Jak paviedamlałasia, strałok byŭ apranuty jak kurjer słužby dastaŭki. Pavodle najaŭnaj infarmacyi, jon vykarystaŭ elektrarovar. Napadnik padyšoŭ da Parubija i vosiem razoŭ streliŭ u jaho, paśla čaho źjechaŭ ź miesca złačynstva.