Baksior Alaksandr Usik havaryŭ pra traŭmu śpiny, a sam licha vytancoŭvaŭ na scenie. Uźnik skandał
Suśvietnaja baksiorskaja arhanizacyja (WBO) zapatrabavała ad słavutaha ŭkrainskaha baksiora Alaksandra Usika da paniadziełka padać abnoŭlenaje miedycynskaje zaklučeńnie. Pryčynaj staŭ videarolik u sacsietkach, dzie niepieramožny čempijon tančyć i hulaje ŭ futboł, choć raniej jahonaja kamanda prasiła adkłaści pieramovy ab abaviazkovym pajadynku z novaziełandcam Džozefam Parkieram z-za prablem spartsmiena sa śpinaj.
Alaksandr Usik. Fota: AP/Kin Cheung
U svaim liście kamitet WBO padkreśliŭ, što padadzienaja miedycynskaja infarmacyja pavinna dakładna adlustravać stan zdaroŭja čempijona, prahnoz i terminy adnaŭleńnia. U vypadku adsutnaści patrebnych źviestak arhanizacyja pakinie za saboj prava pryniać miery pavodle rehłamienta.
Alaksandr Usik 20 lipienia staŭ absalutnym čempijonam śvietu ŭ ciažkaj vazie, nakaŭtam pieramohšy brytanca Daniela Dziubua ŭ piatym raundzie. Ciapier dla abarony tytułu WBO jamu treba pravieści boj suprać novaziełandca Džozefa Parkiera.
Kamanda Usika ŭ žniŭni padała siertyfikavanyja dakumienty ź Ispanii, dzie havaryłasia pra traŭmu śpiny i nieabchodnaść dvuch miesiacaŭ reabilitacyi. Usik prasiŭ 90-dzionnuju paŭzu ŭ pieramovach, i WBO hatovaja było pajści nasustrač.
Ale niadaŭna ŭ sacsietkach źjaviłasia videa, dzie Usik tančyć, skača i krucicca, što supiarečyć raniejšym miedycynskim rekamiendacyjam ab adpačynku i fizijaterapii. Videa vyklikała abureńnie ŭ łahiery Parkiera.
Pakul WBO čakaje abnoŭlenuju infarmacyju, Džozef Parkier razhladaje mahčymaść vyjści na rynh naprykancy hoda suprać anhličanina Fabia Uordli.
Čytajcie taksama:
Ukrainiec Usik nakaŭtavaŭ Dziubua ŭ bai za zvańnie absalutnaha čempijona śvietu ŭ ciažkaj vazie
«Pažyvi ŭ maim domie»: Usik zaprasiŭ Trampa va Ukrainu na tydzień