Biełaruskich bijatłanistaŭ nie puściać na Alimpijadu navat u niejtralnym statusie

Mižnarodny sajuz bijatłanistaŭ (IBU) apublikavaŭ śpis krain, jakija atrymali kvoty na ŭdzieł u Zimovych Alimpijskich hulniach — 2026 u italjanskich Miłanie i Karcina d'Ampieca. 

Bijatłanist Anton Smolski, srebrany pryzior Alimpijady-2022 u Piekinie. Fota: NAK Biełarusi

Asnoŭnyja miescy byli raźmierkavanyja pavodle vynikaŭ Kubka nacyj: ad 6 kvot dla lidaraŭ da 4 — dla kamandaŭ z 11-ha pa 20-je miesca. Usiaho ŭžo raźmierkavanyja 186 z 210 miescaŭ. Jašče 24 miescy buduć vyznačanyja indyvidualna ŭ studzieni 2026 hoda.

Biełarusaŭ u hetym śpisie niama, bo jany, jak i rasijanie, apošnija hady z-za sankcyj nie ŭdzielničali ŭ mižnarodnych spabornictvach pad ehidaj IBU. Praviły hetaj mižnarodnaj fiederacyi nie praduhledžvajuć i ŭdziełu niejtralnych atletaŭ.

Heta značyć, što spartsmieny ź Biełarusi i Rasii, jakich MAK dapuskaje na Hulni tolki bieź dziaržaŭnaj simvoliki, nie zmohuć startavać ni ŭ Kubku śvietu, ni na samaj Alimpijadzie.

Takim čynam, biełaruski bijatłon zastajecca ŭ poŭnaj izalacyi, jak i ad pačatku vajny va Ukrainie, kali mižnarodnyja fiederacyi masava zabaranili ŭdzieł u spabornictvach atletaŭ ź Biełarusi i Rasii.

Kamientary da artykuła